main jina chahta hun magar

maiñ jiinā chāhtā huuñ

magar kīḌe-makoḌoñ aur be-māya maḳhlūqāt kī tarah

reñg reñg kar nahīñ!

maiñ jiinā chāhtā huuñ

magar apne bātin meñ

kulbulāte shar par

zāhirī aḳhlāq kī ridā

Daal kar nahīñ

maiñ jiinā chāhtā huuñ

magar aise nahīñ

ki mere vajūd ke andar

buġhz havas aur riyā-kārī kī bārūdī surañgeñ

bichhī hoñ

aur har lahza har pal

ye ḳhauf

ki kab koī

remote control se

anā aur ġhairat ehsās aur jazbe

kī ḳhūb-sūrat imāratoñ ko

Dhā de

maiñ jiinā chāhtā huuñ

apne puure vajūd kī saarī ikā.īyoñ ke saath

aur mujhe ye ehsās na satā.e

ki ye zindagī

kisī kī bhiik meñ dī huī sāñsoñ kā hissa hai

maiñ jiinā chāhtā huuñ

ek aisī duniyā meñ

jahāñ mulk-gīrī ke junūn

itne shadīd na hoñ ki

itemi tavānā.ī se mumayyaz ālāt fazā ko masmūm kar deñ

insān us kī hazāroñ barsoñ kī purānī qadreñ

aisī pāmāl ho jaa.eñ jaise haqīr zarre

magar maiñ jāntā huuñ

ye sab mumkin nahīñ

to maiñ marnā chāhūñgā

par aisī maut nahīñ

ki merī laash ko

qabristān tak pahuñchāne meñ

takalluf majbūrī aur zabardastī kā shā.iba ho

yā duā meñ hilte hue lab

aur uThā.e hue haath

majbūrān o rasman hoñ

haañ aisī maut jo kisī kī āñkhoñ meñ

Thahre hue chand qatre

ḳhāmoshī se mere kafan meñ

jazb ho jaa.eñ

aur bas!!

main jina chahta hun

magar kiDe-makoDon aur be-maya maKHluqat ki tarah

reng reng kar nahin!

main jina chahta hun

magar apne baatin mein

kulbulate shar par

zahiri aKHlaq ki rida

Dal kar nahin

main jina chahta hun

magar aise nahin

ki mere wajud ke andar

bughz hawas aur riya-kari ki barudi surangen

bichhi hon

aur har lahza har pal

ye KHauf

ki kab koi

remote control se

ana aur ghairat ehsas aur jazbe

ki KHub-surat imaraton ko

Dha de

main jina chahta hun

apne pure wajud ki sari ikaiyon ke sath

aur mujhe ye ehsas na satae

ki ye zindagi

kisi ki bhik mein di hui sanson ka hissa hai

main jina chahta hun

ek aisi duniya mein

jahan mulk-giri ke junun

itne shadid na hon ki

itemi tawanai se mumayyaz aalat faza ko masmum kar den

insan us ki hazaron barson ki purani qadren

aisi pamal ho jaen jaise haqir zarre

magar main jaanta hun

ye sab mumkin nahin

to main marna chahunga

par aisi maut nahin

ki meri lash ko

qabristan tak pahunchane mein

takalluf majburi aur zabardasti ka shaiba ho

ya dua mein hilte hue lab

aur uThae hue hath

majburan o rasman hon

han aisi maut jo kisi ki aankhon mein

Thahre hue chand qatre

KHamoshi se mere kafan mein

jazb ho jaen

aur bas!!