Main kitne barson se roz

maiñ kitne barsoñ se roz apne anā kī ek parat

chhīltā huuñ

lahū lahū in hazār partoñ kī tah meñ patthar huuñ

jāntā huuñ

ye kahkashā.eñ ye kā.enāteñ ye raushnī ke siyāh raste

guzar ke terī talāsh meñ haiñ

ki ho na ho tum vahāñ kahīñ merī muntazir ho

mujhe yaqīñ hai ki tum merī baat sun rahī ho

magar nahīñ ho, ki ye jo tum ho, ye tum nahīñ ho

mirī anā kā koī nagar ho

ki jis ke raushan siyāh kūchoñ meñ

sar-kaTe ajnabī bhare haiñ

maiñ ruuh ke reshmī libāde haTā ke ḳhud se milūñgā lekin

mujhe ḳhabar hai ki tum vahāñ bhī nahīñ milogī

ki tum parastish kī aarzū kā koī bhañvar ho

koī ḳhudāvand-e-lab mile to

ki apnī banjar adā ke mandir meñ mūrtī kī tarah khaḌī ho

hazār sadiyoñ se raah tak tak ke jam ga.ī ho

main kitne barson se roz apne ana ki ek parat

chhilta hun

lahu lahu in hazar parton ki tah mein patthar hun

jaanta hun

ye kahkashaen ye kaenaten ye raushni ke siyah raste

guzar ke teri talash mein hain

ki ho na ho tum wahan kahin meri muntazir ho

mujhe yaqin hai ki tum meri baat sun rahi ho

magar nahin ho, ki ye jo tum ho, ye tum nahin ho

meri ana ka koi nagar ho

ki jis ke raushan siyah kuchon mein

sar-kaTe ajnabi bhare hain

main ruh ke reshmi libaade haTa ke KHud se milunga lekin

mujhe KHabar hai ki tum wahan bhi nahin milogi

ki tum parastish ki aarzu ka koi bhanwar ho

koi KHudawand-e-lab mile to

ki apni banjar ada ke mandir mein murti ki tarah khaDi ho

hazar sadiyon se rah tak tak ke jam gai ho