maine shairi likkhi

sukūt-e-shab meñ ḳhayālāt kī ravānī meñ

jo lafz maiñ ne likhe the na.ī kahānī meñ

maiñ aise lafzoñ ko pāband karne aayā huuñ

sutūr-e-haq kā maiñ tāvān bharne aayā huuñ

suḳhan-varī kī nazākat se huuñ nahīñ vāqif

munāfiqoñ kī siyāsat se huuñ nahīñ vāqif

jo mere dil meñ hai us ko kalām kartā huuñ

maiñ apne 'ishq ko valiyoñ ke naam kartā huuñ

ye kaise hogā ki maiñ bheḌiyoñ se Dar jā.ūñ

mirī sarisht meñ shāmil hai laḌ ke mar jā.ūñ

maiñ siina Thoñk ke kahtā huuñ karbalā.ī huuñ

maiñ huuñ payambar-e-haq amn kā maiñ daa’ī huuñ

maiñ manzaroñ ko badalne kī taab rakhtā huuñ

maiñ apnī jholī meñ chand aise ḳhvāb rakhtā huuñ

likhāriyoñ kā jo mela hai maiñ ne parkhā hai

qalam amānat-e-rab hai unheñ ḳhabar hī nahīñ

inheñ numā.ishī shohrat se itnī raġhbat hai

hai raat zulm kī aur vā’da-e-sahar hī nahīñ

junūn-e-'ishq kā fuqdān kyoñ huā in meñ

jo in ke man meñ sadāqat nahīñ to kuchh bhī nahīñ

mirā qalam to hai ehsās-e-dard se bojhal

nahīñ hai 'azmat-e-insān agar to kuchh bhī nahīñ

jo maiñ ne dekhā hai rāh-e-vafā meñ vo sun lo

zarā sā ek diyā hai jo TimTimātā huā

ye bād-o-bārāñ kī ik zarb sah na pā.egā

añdherā maut kī sūrat meñ phail jā.egā

so is se pahle ruke kārvān-e-she'r-o-suḳhan

so is se pahle ruke merī saañs aur dhaḌkan

qalam kī khaa.ī qasam maiñ ne āgahī likkhī

ḳhudā-e-vāhid-o-bartar kī bartarī likkhī

ye saarā khel tamāshā ye zindagī likkhī

ye be-sabātī likhī apnī bebasī likkhī

suḳhan-varī hī to 'bāsit' hai merā vasf-e-digar

so maiñ ne she'r kahā maiñ ne shā'irī likkhī

sukut-e-shab mein KHayalat ki rawani mein

jo lafz main ne likhe the nai kahani mein

main aise lafzon ko paband karne aaya hun

sutur-e-haq ka main tawan bharne aaya hun

suKHan-wari ki nazakat se hun nahin waqif

munafiqon ki siyasat se hun nahin waqif

jo mere dil mein hai us ko kalam karta hun

main apne 'ishq ko waliyon ke nam karta hun

ye kaise hoga ki main bheDiyon se Dar jaun

meri sarisht mein shamil hai laD ke mar jaun

main sina Thonk ke kahta hun karbalai hun

main hun payambar-e-haq amn ka main da’i hun

main manzaron ko badalne ki tab rakhta hun

main apni jholi mein chand aise KHwab rakhta hun

likhaariyon ka jo mela hai main ne parkha hai

qalam amanat-e-rab hai unhen KHabar hi nahin

inhen numaishi shohrat se itni raghbat hai

hai raat zulm ki aur wa’da-e-sahar hi nahin

junun-e-'ishq ka fuqdan kyon hua in mein

jo in ke man mein sadaqat nahin to kuchh bhi nahin

mera qalam to hai ehsas-e-dard se bojhal

nahin hai 'azmat-e-insan agar to kuchh bhi nahin

jo main ne dekha hai rah-e-wafa mein wo sun lo

zara sa ek diya hai jo TimTimata hua

ye baad-o-baran ki ek zarb sah na paega

andhera maut ki surat mein phail jaega

so is se pahle ruke karwan-e-she'r-o-suKHan

so is se pahle ruke meri sans aur dhaDkan

qalam ki khai qasam main ne aagahi likkhi

KHuda-e-wahid-o-bartar ki bartari likkhi

ye sara khel tamasha ye zindagi likkhi

ye be-sabaati likhi apni bebasi likkhi

suKHan-wari hi to 'basit' hai mera wasf-e-digar

so main ne she'r kaha main ne sha'iri likkhi