main pachhta raha hun

musībat meñ ḳhud ko giraftār karke

javānī ko apnī ik āzār karke

banā kar tumheñ rāz-dāñ zindagī kā

valī raaz kā tum pe iz.hār karke

maiñ pachhtā rahā huuñ tumheñ pyaar karke

maiñ samjhā thā mohsin sitamgār nikle

vafādār samjhā jafā-kār nikle

samajhtā rahā tum ko gul se bhī behtar

magar gul ke parde meñ tum ḳhaar nikle

maiñ pachhtā rahā huuñ tumheñ pyaar karke

mirī zindagī zindagī ab nahīñ hai

masarrat nahīñ hai ḳhushī ab nahīñ hai

laboñ se mire chhīn lī muskurāhaT

muqaddar meñ jaise hañsī ab nahīñ hai

maiñ pachhtā rahā huuñ tumheñ pyaar karke

ummīdoñ kā markaz jahān-e-tamannā

sukūn-e-nazar dil kī taskīn-e-bejā

fareb-e-musalsal diye maiñ ne dil ko

ḳhilāf-e-tavaqqo.a magar tum ko paayā

maiñ pachhtā rahā huuñ tumheñ pyaar karke

mirī zindagī ke gulistāñ se khele

mirī yaas se mere armāñ se khele

khilaunā samajh kar mire dil ko toḌā

mirī ziist ke sāz-o-sāmāñ se khele

maiñ pachhtā rahā huuñ tumheñ pyaar karke

tamannāoñ kā ḳhuun tum ne bahāyā

ummīdoñ kā tum ne janāza nikālā

na kī koī bhūle se bhī ik ināyat

kiyā paas ik din na merī vafā kā

maiñ pachhtā rahā huuñ tumheñ pyaar karke

sadā tum baratte rahe ho taġhāful

jafāoñ kā ik din na TuuTā tasalsul

fareb-e-musalsal maiñ khātā rahā huuñ

hamesha mire dil ko dete rahe jul

maiñ pachhtā rahā huuñ tumheñ pyaar karke

ḳhushī ḳhaak meñ tum ne haa.e milā dī

hamesha jafāoñ se dād-e-vafā dī

maiñ afzal faqat naam kā rah gayā huuñ

yahāñ tak mirī tum ne hastī haTā dī

maiñ pachhtā rahā huuñ tumheñ pyaar karke

musibat mein KHud ko giraftar karke

jawani ko apni ek aazar karke

bana kar tumhein raaz-dan zindagi ka

wali raaz ka tum pe izhaar karke

main pachhta raha hun tumhein pyar karke

main samjha tha mohsin sitamgar nikle

wafadar samjha jafa-kar nikle

samajhta raha tum ko gul se bhi behtar

magar gul ke parde mein tum KHar nikle

main pachhta raha hun tumhein pyar karke

meri zindagi zindagi ab nahin hai

masarrat nahin hai KHushi ab nahin hai

labon se mere chhin li muskurahaT

muqaddar mein jaise hansi ab nahin hai

main pachhta raha hun tumhein pyar karke

ummidon ka markaz jahan-e-tamanna

sukun-e-nazar dil ki taskin-e-beja

fareb-e-musalsal diye main ne dil ko

KHilaf-e-tawaqqoa magar tum ko paya

main pachhta raha hun tumhein pyar karke

meri zindagi ke gulistan se khele

meri yas se mere arman se khele

khilauna samajh kar mere dil ko toDa

meri zist ke saz-o-saman se khele

main pachhta raha hun tumhein pyar karke

tamannaon ka KHun tum ne bahaya

ummidon ka tum ne janaza nikala

na ki koi bhule se bhi ek inayat

kiya pas ek din na meri wafa ka

main pachhta raha hun tumhein pyar karke

sada tum baratte rahe ho taghaful

jafaon ka ek din na TuTa tasalsul

fareb-e-musalsal main khata raha hun

hamesha mere dil ko dete rahe jul

main pachhta raha hun tumhein pyar karke

KHushi KHak mein tum ne hae mila di

hamesha jafaon se dad-e-wafa di

main afzal faqat nam ka rah gaya hun

yahan tak meri tum ne hasti haTa di

main pachhta raha hun tumhein pyar karke