main zaKHmon ko phir se kuredun

bahut din se

vo yaad aayā nahīñ hai

bahut din se maiñ ne

udāsī ko apne ḳhayāloñ kī

TuuTī huī khiḌkiyoñ meñ sajāyā nahīñ hai

bahut din se

kamre meñ gahrī ghanī tīrgī hai

magar ab

badan ko na.e ḳhvāb aane lage haiñ

kitāboñ meñ sūkhe hue phuul phir muskurāne lage haiñ

magar in meñ ḳhushbū na.ī hai

mujhe yaad hai

tum ne jo phuul mujh ko diye the

tumhārī hī ḳhushbū thī un meñ

mujhe ḳhud hī hairat hai kaise

darīche se bāhar kā manzar badalne lagā hai

parinde daraḳhtoñ meñ phir chahchahāne lage haiñ

havā.eñ na.e giit gaane lagī haiñ

pahāḌoñ se girte hue ābshāroñ meñ phir se

dhanak muskurāne lagī hai

mujhe aise mausam meñ

yādoñ ke album ko chhūne se bhī ḳhauf aane lagā hai

ajab kashmakash hai

mire zehn-o-dil meñ

maiñ ab phir se

mahsūs karne lagā huuñ

ki zaḳhmoñ ko apne kuredūñ

ajab kyā

koī raushnī kī kiran

mujh ko andar kī sharmindagī se bachā le

bahut din se

wo yaad aaya nahin hai

bahut din se main ne

udasi ko apne KHayalon ki

TuTi hui khiDkiyon mein sajaya nahin hai

bahut din se

kamre mein gahri ghani tirgi hai

magar ab

badan ko nae KHwab aane lage hain

kitabon mein sukhe hue phul phir muskurane lage hain

magar in mein KHushbu nai hai

mujhe yaad hai

tum ne jo phul mujh ko diye the

tumhaari hi KHushbu thi un mein

mujhe KHud hi hairat hai kaise

dariche se bahar ka manzar badalne laga hai

parinde daraKHton mein phir chahchahane lage hain

hawaen nae git gane lagi hain

pahaDon se girte hue aabshaaron mein phir se

dhanak muskurane lagi hai

mujhe aise mausam mein

yaadon ke album ko chhune se bhi KHauf aane laga hai

ajab kashmakash hai

mere zehn-o-dil mein

main ab phir se

mahsus karne laga hun

ki zaKHmon ko apne kuredun

ajab kya

koi raushni ki kiran

mujh ko andar ki sharmindagi se bacha le