main zinda hun

maiñ suntā huuñ so zinda huuñ

maiñ sūñghūñ huuñ so zinda huuñ

aur lams bhī zinda hai merā

hairānī ab tak baaqī hai

hai merī basīrat ab bhī javāñ

aur chakhne se parhez kahāñ

par sochnā mujh ko dūbhar hai

ki soch kī rāheñ mushkil haiñ

jo sochte haiñ kab jiite haiñ

yā zahr kā pyāla piite haiñ

yā sadme se mar jaate haiñ

maiñ zinda rahnā chāhtā huuñ

to ret meñ de kar sar apnā

maiñ suntā huuñ maiñ sūñghtā huuñ

ik lams-e-basīrat baaqī hai

maiñ suntā huuñ maiñ sūñghtā huuñ

maiñ zinda huuñ maiñ zinda huuñ

mujh ko nahīñ jiine kī parvā

maiñ zinda rahnā chāhtā huuñ

main sunta hun so zinda hun

main sunghun hun so zinda hun

aur lams bhi zinda hai mera

hairani ab tak baqi hai

hai meri basirat ab bhi jawan

aur chakhne se parhez kahan

par sochna mujh ko dubhar hai

ki soch ki rahen mushkil hain

jo sochte hain kab jite hain

ya zahr ka pyala pite hain

ya sadme se mar jate hain

main zinda rahna chahta hun

to ret mein de kar sar apna

main sunta hun main sunghta hun

ek lams-e-basirat baqi hai

main sunta hun main sunghta hun

main zinda hun main zinda hun

mujh ko nahin jine ki parwa

main zinda rahna chahta hun