maKHzan

safar merā muqaddar thā safar merā muqaddar hai

añdheroñ kī jabīñ par maiñ ne chhoḌe naqsh-e-pā apne

maiñ dariyā huuñ

janam mujh ko diyā hai barf-poshī sard rātoñ ne

likhā hai mere safhoñ par

ki jab maiñ qatra qatra joḌ kar mauj-e-yaqīñ kā pairahan pahnūñ

to sab anjān samteñ merī muTThī meñ simaT aa.eñ

jo parbat baap hai merā

taras jaa.e mujhe bāhoñ meñ bharne ko

ye ūñchā āsmāñ jhuk kar kabhī mere qadam chūme

safar merā muqaddar hai

safar merā azal merā abad merā yaqīñ bhī hai

mire qadmoñ kā ġham karb-e-zamīñ bhī hai

samundar rāsta merā

musalsal mujh ko chalnā hai

musalsal barf kī sūrat pighalnā hai

agar maiñ baiTh jā.ūñ raah meñ thak kar

to ye pyāse ujāle mujh ko pī jaa.eñ

agar maiñ dasht ban jaatā

agar sahrā kī bāñhoñ meñ bikhar jaatā

samundar kaise kahlātā

havā.eñ sochtīñ mujh ko

agar sho.ale harārat mujh meñ bhar dete

maiñ dariyā huuñ safar merā muqaddar hai

mujhe ruknā nahīñ hai sirf chalnā hai

chalo achchhā huā tum ne mujhe aañsū banā Daalā

ki maiñ ne aaj ḳhud ko ek aañsū kī tarah bahte

tumhārī Dūbtī āñkhoñ meñ dekhā hai

maiñ dariyā huuñ

yahī aañsū virāsat meñ milā mujh ko

mujhe lagtā hai kuchh aisā

maiñ parbat se nahīñ shāyad samundar se hī niklā huuñ

safar mera muqaddar tha safar mera muqaddar hai

andheron ki jabin par main ne chhoDe naqsh-e-pa apne

main dariya hun

janam mujh ko diya hai barf-poshi sard raaton ne

likha hai mere safhon par

ki jab main qatra qatra joD kar mauj-e-yaqin ka pairahan pahnun

to sab anjaan samten meri muTThi mein simaT aaen

jo parbat bap hai mera

taras jae mujhe bahon mein bharne ko

ye uncha aasman jhuk kar kabhi mere qadam chume

safar mera muqaddar hai

safar mera azal mera abad mera yaqin bhi hai

mere qadmon ka gham karb-e-zamin bhi hai

samundar rasta mera

musalsal mujh ko chalna hai

musalsal barf ki surat pighalna hai

agar main baiTh jaun rah mein thak kar

to ye pyase ujale mujh ko pi jaen

agar main dasht ban jata

agar sahra ki banhon mein bikhar jata

samundar kaise kahlata

hawaen sochtin mujh ko

agar shoale hararat mujh mein bhar dete

main dariya hun safar mera muqaddar hai

mujhe rukna nahin hai sirf chalna hai

chalo achchha hua tum ne mujhe aansu bana Dala

ki main ne aaj KHud ko ek aansu ki tarah bahte

tumhaari Dubti aankhon mein dekha hai

main dariya hun

yahi aansu wirasat mein mila mujh ko

mujhe lagta hai kuchh aisa

main parbat se nahin shayad samundar se hi nikla hun