mallah

ye gaate zalzale ye nāchte tūfān ke dhāre

havā kī niyyatoñ se be-ḳhabar mallāh bechāre

vo tūfānoñ ke hal chalne lage sayyāl khetī meñ

vo kashtī aa ke Duubī gauharīñ qatroñ kī retī meñ

vo TūTīñ mauj kī shaffāf dīvāreñ safīnoñ par

vo phir lahreñ ubhar aa.iiñ irādoñ kī jabīnoñ par

vo Takrāne lagī āvāz niile āsmānoñ se

vo ḳhatt-e-rahguzar par jal uThīñ sham.eñ tarānoñ se

havā.eñ tham nahīñ saktīñ talātum ruk nahīñ sakte

safīne haiñ ki tūfāñ ke thapeḌe khaa.e jaate haiñ

magar mallāh giit apne barābar ga.e jaate haiñ

haiñ kitne ġham ki jin kī mai surūr-añgez hotī hai

haiñ kitne giit jin kī lau havā se tez hotī hai

khiñchā ho jin kā ḳhatt-e-rahguzar tūfāñ ke dhāroñ par

baḌī mushkil se un ko niiñd aatī hai kināroñ par

ye gate zalzale ye nachte tufan ke dhaare

hawa ki niyyaton se be-KHabar mallah bechaare

wo tufanon ke hal chalne lage sayyal kheti mein

wo kashti aa ke Dubi gauharin qatron ki reti mein

wo TuTin mauj ki shaffaf diwaren safinon par

wo phir lahren ubhar aain iradon ki jabinon par

wo Takrane lagi aawaz nile aasmanon se

wo KHatt-e-rahguzar par jal uThin shamen taranon se

hawaen tham nahin saktin talatum ruk nahin sakte

safine hain ki tufan ke thapeDe khae jate hain

magar mallah git apne barabar gae jate hain

hain kitne gham ki jin ki mai surur-angez hoti hai

hain kitne git jin ki lau hawa se tez hoti hai

khincha ho jin ka KHatt-e-rahguzar tufan ke dhaaron par

baDi mushkil se un ko nind aati hai kinaron par