manzar se pas manzar tak

khiḌkī par mahtāb Tikā thā

raat sunahrī thī

aur dīvār pe saa.at gintī

soī soī ghaḌī kī suuī

chalte chalte samt gañvā kar ġhaltāñ pechāñ thī

maiñ bhī ḳhud se aañkh churā kar

apne haal se haath chhuḌā kar

barsoñ ko farsang banā kar

jaane kitnī duur chalā thā

jaane kis ko DhūñD rahā thā

dhuñdle dhuñdle chehre kaise rang rañgīle the

piile piile phuul the āñchal niile niile the

kyā chamkīlī āñkheñ kaise ḳhvāb sajīle the

lekin āñkheñ nam thiiñ manzar siile siile the

ik chehra thā raushan jaise chāñd ghaTāoñ meñ

ik muskān thī jaise bikhreñ rang fazāoñ meñ

manzar manzar taktā jaatā chaltā jaatā maiñ

is manzar se us manzar tak baḌhtā jaatā maiñ

ik tasvīr ko ruk kar dekhā ruk nahīñ paayā maiñ

is khiḌkī se us āñgan tak jhuk nahīñ paayā maiñ

jaise is shab chalte rahnā qismat Thahrī thī

mere ta.āqub meñ

yādoñ kī pachhal-pairī thī

khiDki par mahtab Tika tha

raat sunahri thi

aur diwar pe saat ginti

soi soi ghaDi ki sui

chalte chalte samt ganwa kar ghaltan pechan thi

main bhi KHud se aankh chura kar

apne haal se hath chhuDa kar

barson ko farsang bana kar

jaane kitni dur chala tha

jaane kis ko DhunD raha tha

dhundle dhundle chehre kaise rang rangile the

pile pile phul the aanchal nile nile the

kya chamkili aankhen kaise KHwab sajile the

lekin aankhen nam thin manzar sile sile the

ek chehra tha raushan jaise chand ghaTaon mein

ek muskan thi jaise bikhren rang fazaon mein

manzar manzar takta jata chalta jata main

is manzar se us manzar tak baDhta jata main

ek taswir ko ruk kar dekha ruk nahin paya main

is khiDki se us aangan tak jhuk nahin paya main

jaise is shab chalte rahna qismat Thahri thi

mere taaqub mein

yaadon ki pachhal-pairi thi