maqsud-ali-diwana

''rishte, chāhat, shohrat, daulat

tere liye sab be-māya

taarā hai kisī kī āñkhoñ kā tū

aur na kisī kā māñ-jāyā

hai dost na koī ham-sāya

maidānoñ se āñkhoñ kī guzartā ik saaya

maqsūd-ali! maqsūd-alī!

dīvāna hai tū ham ko batā

yā koī valī?

''vo roz-e-azal kā dohrāyā

hai ik saaya

jis kī ik duniyā hai apnī

dahshat ke mehvar par gardāñ

vo duniyā roz o shab meñ jo taqsīm nahīñ

ḳhānoñ meñ baTī taqvīm nahīñ

jo raaz haiñ ham se maḳhfī

us par zāhir haiñ

vo qalb-e-hastī ke andar

ham bāhar haiñ

mādūm hai vo maujūd ho tum

vo lā-had hai mahdūd ho tum

hastī ke aalam se baalā

hargiz vo tum se baat nahīñ karne vaalā

vo sannāTe kā harkāra hai, hoñT sile

hai duur kahīñ, ham sab se pare

kohre meñ ghirī āvāz pe apne kaan dhare

(yā ġhār-e-qadīmī kī sañgīñ tārīkī meñ

bahr-e-āġhāz ke paanī kā

pur-haul taqātur suntā hai

aur jhuk kar bahte paanī se

tāroñ ke zarre chuntā (hai

vo roz-e-azal kā dohrāyā

ik saayā hai

jo darham-barham kar dene duniyā ko hamārī aayā hai''

rishte, chahat, shohrat, daulat

tere liye sab be-maya

tara hai kisi ki aankhon ka tu

aur na kisi ka man-jaya

hai dost na koi ham-saya

maidanon se aankhon ki guzarta ek saya

maqsud-ali! maqsud-ali!

diwana hai tu hum ko bata

ya koi wali?

wo roz-e-azal ka dohraya

hai ek saya

jis ki ek duniya hai apni

dahshat ke mehwar par gardan

wo duniya roz o shab mein jo taqsim nahin

KHanon mein baTi taqwim nahin

jo raaz hain hum se maKHfi

us par zahir hain

wo qalb-e-hasti ke andar

hum bahar hain

madum hai wo maujud ho tum

wo la-had hai mahdud ho tum

hasti ke aalam se baala

hargiz wo tum se baat nahin karne wala

wo sannaTe ka harkara hai, honT sile

hai dur kahin, hum sab se pare

kohre mein ghiri aawaz pe apne kan dhare

(ya ghaar-e-qadimi ki sangin tariki mein

bahr-e-aghaz ke pani ka

pur-haul taqatur sunta hai

aur jhuk kar bahte pani se

taron ke zarre chunta (hai

wo roz-e-azal ka dohraya

ek saya hai

jo darham-barham kar dene duniya ko hamari aaya hai