marsiya-e-tagore

tagore jin guloñ meñ hai ab shumār terā

muddat se un guloñ ko thā intizār terā

lekin payām-e-furqat afsos jab se aaya

ik ālam-e-tafakkur hindostāñ pe chhāyā

is ke dil-e-hazīñ kā thā tū habīb baaqī

ik tū hī rah gayā thā is mai-kade kā saaqī

TuuTī sī ek miinā ab tujh ko ro rahī hai

ro ro ke muñh vo apnā ashkoñ se dho rahī hai

mulk-e-suḳhan kā tujh sā farmāñ-ravā na dekhā

duniyā-e-shā.irī kā tujh sā ḳhudā na dekhā

DhūñDā kareñgī tujh ko hasrat bharī nigāheñ

jā.eñgī saath tere is desh kī duā.eñ

kuchh bebasī kā aalam gar ai ḳhudā na hotā

tagore is tarah se ham se judā na hotā

tagore jin gulon mein hai ab shumar tera

muddat se un gulon ko tha intizar tera

lekin payam-e-furqat afsos jab se aaya

ek aalam-e-tafakkur hindostan pe chhaya

is ke dil-e-hazin ka tha tu habib baqi

ek tu hi rah gaya tha is mai-kade ka saqi

TuTi si ek mina ab tujh ko ro rahi hai

ro ro ke munh wo apna ashkon se dho rahi hai

mulk-e-suKHan ka tujh sa farman-rawa na dekha

duniya-e-shairi ka tujh sa KHuda na dekha

DhunDa karengi tujh ko hasrat bhari nigahen

jaengi sath tere is desh ki duaen

kuchh bebasi ka aalam gar ai KHuda na hota

tagore is tarah se hum se juda na hota