marsiya

vo ik peḌ jo is 'ilāqe kī sab se baḌī shaḳhsiyat thā

apne chāroñ taraf ke makānoñ ko jis ne

thaam kar unglī chalnā sikhāyā

use sab ḳhabar thī

ki kis ghar meñ kis kī laḌā.ī huī hai

magar chup rahā

aur har ghar ke har raaz ko us ne sab se chhupāyā

kachchī dīvāreñ aksar

koTharī kī shikāyat jo kartī thiiñ us se

to un ko biThā kar

pyaar se muskurā kar

zarā DāñTtā thā

sadr darvāzoñ kā

saare dālānoñ se fāsla thā magar

chañd jhoñkoñ se vo fāsla pāTtā thā

vahī peḌ ab sar jhukā.e khaḌā hai

kachchī dīvāroñ ke chhoTe chhoTe makāñ

pakkī īñToñ ke do-manzile ho ga.e haiñ

peḌ ḳhāmosh hai

vo makāñ us ke hisse kī dhūpoñ ko ghere khaḌe haiñ

wo ek peD jo is 'ilaqe ki sab se baDi shaKHsiyat tha

apne chaaron taraf ke makanon ko jis ne

tham kar ungli chalna sikhaya

use sab KHabar thi

ki kis ghar mein kis ki laDai hui hai

magar chup raha

aur har ghar ke har raaz ko us ne sab se chhupaya

kachchi diwaren aksar

koThari ki shikayat jo karti thin us se

to un ko biTha kar

pyar se muskura kar

zara DanTta tha

sadr darwazon ka

sare dalanon se fasla tha magar

chand jhonkon se wo fasla paTta tha

wahi peD ab sar jhukae khaDa hai

kachchi diwaron ke chhoTe chhoTe makan

pakki inTon ke do-manzile ho gae hain

peD KHamosh hai

wo makan us ke hisse ki dhupon ko ghere khaDe hain