mashwara

mujhe ye Dar hai kisī āftāb kī garmī

tirī nazar ke hazār ā.inoñ ko toḌ na de

mujhe ye vahm kisī māhtāb kī ThanDak

lahū se garmī-e-fikr-o-amal nichoḌ na le

tū apnī zaat se ḳhud chashma-e-adā-o-sadā

tujhe jahāñ kī havāoñ ke ruḳh se kyā nisbat

tū apne-āp hī ḳhud anjuman hai ḳhud hī charāġh

hujūm-e-halqa-ba-goshāñ se tujh ko kyā nisbat

ye rāsta nahīñ vo jis pe tū Thahar jaa.e

yahāñ se jald guzar aks-e-mehr-o-mah kī tarah

yahāñ pe koī rukā hai to ḳhār-e-rah kī misāl

yahāñ pe koī rukā hai to gard-e-rah kī tarah

jo āstāñ ho use sañg-e-dar kā ġham kaisā

jo ḳhud safar ho use rahguzar kā ġham kaisā

jo ḳhud yaqīñ ho use vahm-e-intizām se kyā

jo ḳhud hī mai ho use mai-kade ke naam se kyā

mujhe ye Dar hai kisi aaftab ki garmi

teri nazar ke hazar aainon ko toD na de

mujhe ye wahm kisi mahtab ki ThanDak

lahu se garmi-e-fikr-o-amal nichoD na le

tu apni zat se KHud chashma-e-ada-o-sada

tujhe jahan ki hawaon ke ruKH se kya nisbat

tu apne-ap hi KHud anjuman hai KHud hi charagh

hujum-e-halqa-ba-goshan se tujh ko kya nisbat

ye rasta nahin wo jis pe tu Thahar jae

yahan se jald guzar aks-e-mehr-o-mah ki tarah

yahan pe koi ruka hai to KHar-e-rah ki misal

yahan pe koi ruka hai to gard-e-rah ki tarah

jo aastan ho use sang-e-dar ka gham kaisa

jo KHud safar ho use rahguzar ka gham kaisa

jo KHud yaqin ho use wahm-e-intizam se kya

jo KHud hi mai ho use mai-kade ke nam se kya