mausam

bhīge hue mausam kā

andāz nirālā ho

yaḳh-basta se hāthoñ meñ

coffē kā piyāla ho

kamre kī khulī khiḌkī se

bāhar kā nazāra ho

phūloñ kī mahak chhup kar

kamre meñ utar aa.e

ehsās se ḳhushbū ke

ik tāzgī bhar jaa.e

māhaul ho rūmānī

jazboñ meñ ravānī ho

taaza sā tirā chehra

yuuñ sāmne aa jaa.e

ḳhāmosh laboñ par bhī

rangīn kahānī ho

phīkā sā harā jhoñkā

Takrā.e jo shīshe se

ma.asūm sā ik naġhma

kānoñ meñ samā jaa.e

hāthoñ meñ qalam le kar

jab Diary maiñ kholūñ

phir lafzoñ kā jal-thal ho

ho jaa.e ġhazal puurī

bhige hue mausam ka

andaz nirala ho

yaKH-basta se hathon mein

coffee ka piyala ho

kamre ki khuli khiDki se

bahar ka nazara ho

phulon ki mahak chhup kar

kamre mein utar aae

ehsas se KHushbu ke

ek tazgi bhar jae

mahaul ho rumani

jazbon mein rawani ho

taza sa tera chehra

yun samne aa jae

KHamosh labon par bhi

rangin kahani ho

phika sa hara jhonka

Takrae jo shishe se

masum sa ek naghma

kanon mein sama jae

hathon mein qalam le kar

jab Diary main kholun

phir lafzon ka jal-thal ho

ho jae ghazal puri