mawaKHiza

hamāre saath jo kuchh rāhzan bhī haiñ māḳhūz

vo ahl-e-shahr ke kahne se chhūT jā.eñge

gavāh-e-kufr hamīñ meñ hai kaun pahchāne

hamīñ to ek se lagte haiñ aaj sab chehre

hamārā jurm to rū-posh bhī nahīñ ab ke

kisī gavāh kī hājat nahīñ sazā ke liye

dayār-e-ġham kī sadā-e-nahufta pahchāno

havā-e-jabr charāġh-e-nafas ke dar pe hai

ye aur baat hai ḳhud ko chhupā rahā hai magar

valī-e-shahar sambhāle hai taaj kāñToñ kā

hujūm bahar-tamāsha khaḌā hai galiyoñ meñ

ye asr-e-ḳhūñ kī kifālat kā mudda.ī hai abhī

salīb DhūñD rahī hai kisī masīh ko phir

yahī ghaḌī hai har ilzām apne sar le lo

hamare sath jo kuchh rahzan bhi hain maKHuz

wo ahl-e-shahr ke kahne se chhuT jaenge

gawah-e-kufr hamin mein hai kaun pahchane

hamin to ek se lagte hain aaj sab chehre

hamara jurm to ru-posh bhi nahin ab ke

kisi gawah ki hajat nahin saza ke liye

dayar-e-gham ki sada-e-nahufta pahchano

hawa-e-jabr charagh-e-nafas ke dar pe hai

ye aur baat hai KHud ko chhupa raha hai magar

wali-e-shahar sambhaale hai taj kanTon ka

hujum bahar-tamasha khaDa hai galiyon mein

ye asr-e-KHun ki kifalat ka muddai hai abhi

salib DhunD rahi hai kisi masih ko phir

yahi ghaDi hai har ilzam apne sar le lo