mel utarna mushkil lagta hai

saare din ke mel ko

jism se utārnā mushkil lagtā hai

sar ko din bhar kī dhuul se

fāriġh karnā

aur phir gardan ke kaale dā.ere ko

halkā karnā

sābun ke bulbuloñ se

phir āhista āhista un golā.iyoñ kī taraf

baḌhnā

jin par mel kabhī nahīñ chaḌhtā

zarā sī tirchhī

ek taraf ko jhukī huī

sadā kī chamkī-chamkā.ī

unheñ maiñ ab nahīñ dhotī

phir ubhre hue peT par

barsoñ kā pasīna

jame hue chewing-gum kī tarah

kabhī nahīñ utartā

sābun ke jhaag ke bulbule tezī se

us par phūTte rahte haiñ

aur phir be-hañgam kūlhoñ kī

baarī aatī hai

kabhī jab meñ chaltī thī

to sar-phire palaT palaT kar

un ke utarne chaḌhne ko

ghūrte rahte the

naaf se le kar nāḳhunoñ tak

sābun be-Dol jhaag banātā hai

jhaag aur poroñ kī āñkh-micholī

jo mel pasīna ban kar bah jaatī hai

ab jism se mel utārnā

mushkil lagtā hai

sare din ke mel ko

jism se utarna mushkil lagta hai

sar ko din bhar ki dhul se

farigh karna

aur phir gardan ke kale daere ko

halka karna

sabun ke bulbulon se

phir aahista aahista un golaiyon ki taraf

baDhna

jin par mel kabhi nahin chaDhta

zara si tirchhi

ek taraf ko jhuki hui

sada ki chamki-chamkai

unhen main ab nahin dhoti

phir ubhre hue peT par

barson ka pasina

jame hue chewing-gum ki tarah

kabhi nahin utarta

sabun ke jhag ke bulbule tezi se

us par phuTte rahte hain

aur phir be-hangam kulhon ki

bari aati hai

kabhi jab mein chalti thi

to sar-phire palaT palaT kar

un ke utarne chaDhne ko

ghurte rahte the

naf se le kar naKHunon tak

sabun be-Dol jhag banata hai

jhag aur poron ki aankh-micholi

jo mel pasina ban kar bah jati hai

ab jism se mel utarna

mushkil lagta hai