mera watan

rang-o-nasl-o-mazāhib kā a.alā chaman

hind merā vatan hind merā vatan

rakkhe is kā salāmat ḳhudā bāñkpan

hind merā vatan hind merā vatan

is kī nadiyāñ aqīdat kī me.arāj haiñ

sarzamīñ hai dul.han koh sartāj haiñ

gulshanoñ par nirālī shagufta phaban

mausamoñ kā yahāñ apnā me.aar hai

aur har-sū parindoñ kī chahkār hai

jhūme sāvan sajā kar hasīñ anjuman

lahlahāte hue khet raunaq tirī

ḳhuub bāġhāt-o-sahrāoñ kī dilkashī

husn bād-e-sabā meñ hai bū-e-saman

haiñ lab-e-ābshāroñ pe naġhme tire

husn-o-shoḳhī baḌhāne ko ġhunche khule

kyoñ na bhañvre hoñ ḳhush titliyāñ hoñ magan

shāhrāheñ baḌhātī haiñ azmat tirī

aur pagDañDiyāñ shān-o-shaukat tirī

terā mash.hūr duniyā meñ hai ilm-o-fan

tere siina se chashme ubalte hue

god meñ shoḳh dariyā machalte hue

tujh se rakhte haiñ ulfat mohabbat lagan

iid holī to jashn-e-vilādat kahīñ

hai christmas kī rangīñ latāfat kahīñ

terī tahzīb ik ḳhushnumā pairahan

jism ke reza-reza kī āvāz hai

'paikar' apne vatan par mujhe naaz hai

is pe qurbān jaa.e mirī jān-o-tan

rang-o-nasl-o-mazahib ka aala chaman

hind mera watan hind mera watan

rakkhe is ka salamat KHuda bankpan

hind mera watan hind mera watan

is ki nadiyan aqidat ki mearaj hain

sarzamin hai dulhan koh sartaj hain

gulshanon par nirali shagufta phaban

mausamon ka yahan apna mear hai

aur har-su parindon ki chahkar hai

jhume sawan saja kar hasin anjuman

lahlahate hue khet raunaq teri

KHub baghat-o-sahraon ki dilkashi

husn baad-e-saba mein hai bu-e-saman

hain lab-e-abshaaron pe naghme tere

husn-o-shoKHi baDhane ko ghunche khule

kyon na bhanwre hon KHush titliyan hon magan

shahrahen baDhati hain azmat teri

aur pagDanDiyan shan-o-shaukat teri

tera mashhur duniya mein hai ilm-o-fan

tere sina se chashme ubalte hue

god mein shoKH dariya machalte hue

tujh se rakhte hain ulfat mohabbat lagan

id holi to jashn-e-wiladat kahin

hai christmas ki rangin latafat kahin

teri tahzib ek KHushnuma pairahan

jism ke reza-reza ki aawaz hai

'paikar' apne watan par mujhe naz hai

is pe qurban jae meri jaan-o-tan