میرا وطن

رنگ و نسل و مذاہب کا اعلیٰ چمن

ہند میرا وطن ہند میرا وطن

رکھے اس کا سلامت خدا بانکپن

ہند میرا وطن ہند میرا وطن

اس کی ندیاں عقیدت کی معراج ہیں

سرزمیں ہے دلہن کوہ سرتاج ہیں

گلشنوں پر نرالی شگفتہ پھبن

موسموں کا یہاں اپنا معیار ہے

اور ہر سو پرندوں کی چہکار ہے

جھومے ساون سجا کر حسیں انجمن

لہلہاتے ہوئے کھیت رونق تری

خوب باغات و صحراؤں کی دل کشی

حسن باد صبا میں ہے بوئے سمن

ہیں لب آبشاروں پہ نغمے ترے

حسن و شوخی بڑھانے کو غنچے کھلے

کیوں نہ بھونرے ہوں خوش تتلیاں ہوں مگن

شاہراہیں بڑھاتی ہیں عظمت تری

اور پگڈنڈیاں شان و شوکت تری

تیرا مشہور دنیا میں ہے علم و فن

تیرے سینہ سے چشمے ابلتے ہوئے

گود میں شوخ دریا مچلتے ہوئے

تجھ سے رکھتے ہیں الفت محبت لگن

عید ہولی تو جشن ولادت کہیں

ہے کرسمس کی رنگیں لطافت کہیں

تیری تہذیب اک خوش نما پیرہن

جسم کے ریزہ ریزہ کی آواز ہے

پیکرؔ اپنے وطن پر مجھے ناز ہے

اس پہ قربان جائے مری جان و تن