mere dil mein jangal hai

mere dil meñ jañgal hai

aur us meñ bheḌiyā rahtā hai

jo raat ko merī āñkhoñ meñ aa jaatā hai

aur saare manzar khā jaatā hai

sub.h ko sūraj apne pyāle se shabnam Tapkātā hai

aur din kā bachcha

merī ruuh ke jhūle meñ rakh jaatā hai

mere dil meñ jañgal hai

aur us meñ fāḳhta rahtī hai

jo apne paroñ se mere liye

ik parcham buntī rahtī hai

aur ḳhushbū se ik naġhma likhtī rahtī hai

phir thak kar mere bāloñ meñ so jaatī hai

mere dil meñ jañgal hai

aur us meñ jogī rahtā hai

jo mere ḳhuun se apnī sharāb banātā hai

aur apne sitār meñ chhupī huī laḌkī ko

paas bulātā hai

phir jañgal bosa ban jaatā hai

mere dil meñ jañgal hai

aur is meñ bhūlā-bhaTkā zaḳhmī shahzāda hai

jis kā lashkar

ḳhuun kī dhaar pe us ke pīchhe aatā hai

vo apne vatan ke naqshe ko zaḳhmoñ pe bāñdh ke

āḳhirī ḳhutba detā hai

phir mar jaatā hai

mere dil meñ jañgal hai

aur us meñ gahrī ḳhāmoshī hai

mere dil mein jangal hai

aur us mein bheDiya rahta hai

jo raat ko meri aankhon mein aa jata hai

aur sare manzar kha jata hai

subh ko suraj apne pyale se shabnam Tapkata hai

aur din ka bachcha

meri ruh ke jhule mein rakh jata hai

mere dil mein jangal hai

aur us mein faKHta rahti hai

jo apne paron se mere liye

ek parcham bunti rahti hai

aur KHushbu se ek naghma likhti rahti hai

phir thak kar mere baalon mein so jati hai

mere dil mein jangal hai

aur us mein jogi rahta hai

jo mere KHun se apni sharab banata hai

aur apne sitar mein chhupi hui laDki ko

pas bulata hai

phir jangal bosa ban jata hai

mere dil mein jangal hai

aur is mein bhula-bhaTka zaKHmi shahzada hai

jis ka lashkar

KHun ki dhaar pe us ke pichhe aata hai

wo apne watan ke naqshe ko zaKHmon pe bandh ke

aaKHiri KHutba deta hai

phir mar jata hai

mere dil mein jangal hai

aur us mein gahri KHamoshi hai