mere hath sawali hain

mere haath savālī haiñ

aur maiñ ulTā kuñ.eñ kī tah meñ

paanī ke kañdhe jhaTak jhaTak kar

kirnoñ ke yaḳh-basta kabūtar DhūñDh rahā huuñ

chup ke raste lambe ho kar tanhā kivāḌoñ tak pahuñche haiñ

kis kī dastak kaun aayā hai

kaun hai ye jo bārish ke anjāne

tarannum kī chhatrī ke nīche khaḌā hai

ye sunsān havelī aur lakḌī ke phāTak

kis kā rasta takte takte būḌhī umr ko panche haiñ

kal jab chāñd havā ke Tāñgoñ meñ se

sikka ban kar girtā thā

kaaTī fasl ke DanThal duudh kī poroñ meñ ghulte the

aur maiñ apnā ham-chehra thā

donoñ haath mohabbat vaale dil kī sabz muñDeroñ par the

phir na jaane aadhī raat ko kis ke paañv

jaan ke zaḳhmoñ meñ se phūTe

aur sadā kī kaalī āñdhī

duur ufaq se gard kā baTvā le kar uThī

mere hath sawali hain

aur main ulTa kunen ki tah mein

pani ke kandhe jhaTak jhaTak kar

kirnon ke yaKH-basta kabutar DhunDh raha hun

chup ke raste lambe ho kar tanha kiwaDon tak pahunche hain

kis ki dastak kaun aaya hai

kaun hai ye jo barish ke anjaane

tarannum ki chhatri ke niche khaDa hai

ye sunsan haweli aur lakDi ke phaTak

kis ka rasta takte takte buDhi umr ko panche hain

kal jab chand hawa ke Tangon mein se

sikka ban kar girta tha

kaTi fasl ke DanThal dudh ki poron mein ghulte the

aur main apna ham-chehra tha

donon hath mohabbat wale dil ki sabz munDeron par the

phir na jaane aadhi raat ko kis ke panw

jaan ke zaKHmon mein se phuTe

aur sada ki kali aandhi

dur ufaq se gard ka baTwa le kar uThi