mere mahbub

phir ubhar aa.ī hai māhaul ke māthe pe shikan

mere mahbūb

chal ab duur kahīñ duur chaleñ

chal jahāñ pyaar ko nafrat se na dekhā jaa.e

chal jahāñ pyaar ko ik khel na samjhā jaa.e

chal jahāñ pyaar ko daulat se na tolā jaa.e

chal kisī aisī Dagar aise nagar aise vatan

mere mahbūb

chal ab duur kahīñ duur chaleñ

un nigāhoñ se kahīñ duur nazāroñ se pare

ahl-e-duniyā ke pur-asrār ishāroñ se pare

aisī nagrī meñ chaleñ chāñd sitāroñ se pare

jis kī dhartī ho vafā aur mohabbat ho gagan

mere mahbūb

chal ab duur kahīñ duur chaleñ

mere mahbūb

chal ab duur kahīñ duur chaleñ

ġham meñ Duubī huī har raat kī zad meñ aa kar

uljhe uljhe se ḳhayālāt kī zad meñ aa kar

aur phir shorish-e-jazbāt kī zad meñ aa kar

ḳhatm ho jā.egī ik din tire chehre kī phaban

mere mahbūb

chal ab duur kahīñ duur chaleñ

har taraf dekh le chehroñ kī ḳharīdārī hai

pyaar kī aaḌ meñ har samt siyah-kārī hai

husn āvāra hai aur 'ishq bhī bāzārī hai

bik rahe haiñ yahāñ saj-dhaj ke hasīnoñ ke badan

mere mahbūb

chal ab duur kahīñ duur chaleñ

mere mahbūb

chal ab duur kahīñ duur chaleñ

ye bahāreñ ye nazāre haiñ sarāsar dhokā

aañkh phir aañkh hai khā jaatī hai aksar dhokā

aur kyā degā tujhe terā muqaddar dhokā

chāñdnī oḌh ke aa.ī hai ujāloñ kā kafan

mere mahbūb

chal ab duur kahīñ duur chaleñ

Das na le kal tujhe ye shaam suhānī terī

bun na jaa.e koī ġhamgīn kahānī terī

Dhal na jaa.e kahīñ ashkoñ meñ javānī terī

ban na jaa.eñ tirī āñkheñ kisī beva ke nayan

mere mahbūb

chal ab duur kahīñ duur chaleñ

mere mahbūb

chal ab duur kahīñ duur chaleñ

mausam-e-gul kabhī barsāt se jī Dartā hai

aur kabhī shiddat-e-jazbāt se jī Dartā hai

yā'nī ab terī mulāqāt se jī Dartā hai

ab to har tāroñ-bharī raat se hotī hai ghuTan

mere mahbūb

chal ab duur kahīñ duur chaleñ

apnī āñkhoñ meñ hasīñ ḳhvāb sajāne vaale

pyaar ke diip havāoñ meñ jalāne vaale

tujh ko jiine nahīñ deñge ye zamāne vaale

ye banā deñge tire reshmī āñchal ko kafan

mere mahbūb

chal ab duur kahīñ duur chaleñ

phir ubhar aai hai mahaul ke mathe pe shikan

mere mahbub

chal ab dur kahin dur chalen

chal jahan pyar ko nafrat se na dekha jae

chal jahan pyar ko ek khel na samjha jae

chal jahan pyar ko daulat se na tola jae

chal kisi aisi Dagar aise nagar aise watan

mere mahbub

chal ab dur kahin dur chalen

un nigahon se kahin dur nazaron se pare

ahl-e-duniya ke pur-asrar ishaaron se pare

aisi nagri mein chalen chand sitaron se pare

jis ki dharti ho wafa aur mohabbat ho gagan

mere mahbub

chal ab dur kahin dur chalen

mere mahbub

chal ab dur kahin dur chalen

gham mein Dubi hui har raat ki zad mein aa kar

uljhe uljhe se KHayalat ki zad mein aa kar

aur phir shorish-e-jazbaat ki zad mein aa kar

KHatm ho jaegi ek din tere chehre ki phaban

mere mahbub

chal ab dur kahin dur chalen

har taraf dekh le chehron ki KHaridari hai

pyar ki aaD mein har samt siyah-kari hai

husn aawara hai aur 'ishq bhi bazari hai

bik rahe hain yahan saj-dhaj ke hasinon ke badan

mere mahbub

chal ab dur kahin dur chalen

mere mahbub

chal ab dur kahin dur chalen

ye bahaaren ye nazare hain sarasar dhoka

aankh phir aankh hai kha jati hai aksar dhoka

aur kya dega tujhe tera muqaddar dhoka

chandni oDh ke aai hai ujalon ka kafan

mere mahbub

chal ab dur kahin dur chalen

Das na le kal tujhe ye sham suhani teri

bun na jae koi ghamgin kahani teri

Dhal na jae kahin ashkon mein jawani teri

ban na jaen teri aankhen kisi bewa ke nayan

mere mahbub

chal ab dur kahin dur chalen

mere mahbub

chal ab dur kahin dur chalen

mausam-e-gul kabhi barsat se ji Darta hai

aur kabhi shiddat-e-jazbaat se ji Darta hai

ya'ni ab teri mulaqat se ji Darta hai

ab to har taron-bhari raat se hoti hai ghuTan

mere mahbub

chal ab dur kahin dur chalen

apni aankhon mein hasin KHwab sajaane wale

pyar ke dip hawaon mein jalane wale

tujh ko jine nahin denge ye zamane wale

ye bana denge tere reshmi aanchal ko kafan

mere mahbub

chal ab dur kahin dur chalen