mere sathi tere aur mere darmiyan

mere sāthī tire aur mire darmiyān

kis qadar fāsloñ kī fasīleñ khaḌī haiñ yahāñ

merā vīrāna ho yā tirā gulsitāñ

har qadam par hazāroñ salībeñ gaḌī haiñ yahāñ

ārzuoñ ke saa.e haiñ phir bhī ravāñ

hāsil-e-zindagī hāsil-e-bandagī

āñsuoñ kī jalan hasratoñ kā dhuāñ

har ubhartī huī raat kī tīrgī

terī afshāñ se taare churātī rahī

mere āñgan ko aa kar sajātī rahī

sham-e-hastī magar Dagmagātī rahī

dil pukārā kiyā raushnī raushnī

kohr-ālūd rāhoñ pe chalte hue

har qadam par tujhe maiñ ne āvāz dī bārhā

merī āvāz ne ḳhud pukārā mujhe

kho ga.ī in ḳhalāoñ kī yaḳh-bastagī meñ sadā

hijr ke marhale dard ke silsile

karb kī āñdhiyāñ dil kā bujhtā huā ik diyā

tere hoñToñ kī kaliyāñ mahaktī rahīñ

aañkh rotī rahī hoñT hañste rahe

jaane kis manzil-e-zīst par aa ga.e

terī yādoñ ke mahtāb gahnā ga.e

mere sathi tere aur mere darmiyan

kis qadar faslon ki fasilen khaDi hain yahan

mera virana ho ya tera gulsitan

har qadam par hazaron saliben gaDi hain yahan

aarzuon ke sae hain phir bhi rawan

hasil-e-zindagi hasil-e-bandagi

aansuon ki jalan hasraton ka dhuan

har ubharti hui raat ki tirgi

teri afshan se tare churaati rahi

mere aangan ko aa kar sajati rahi

sham-e-hasti magar Dagmagati rahi

dil pukara kiya raushni raushni

kohr-alud rahon pe chalte hue

har qadam par tujhe main ne aawaz di barha

meri aawaz ne KHud pukara mujhe

kho gai in KHalaon ki yaKH-bastagi mein sada

hijr ke marhale dard ke silsile

karb ki aandhiyan dil ka bujhta hua ek diya

tere honTon ki kaliyan mahakti rahin

aankh roti rahi honT hanste rahe

jaane kis manzil-e-zist par aa gae

teri yaadon ke mahtab gahna gae