migraine

dil itnī shiddat se dhaḌkā

ki aañkh ko dard kā qatra

siyāh dikhānā paḌā

zindagī kī zang-ālūd

zanjīroñ meñ jakḌā vajūd

āḳhirī shab kā

zā.iqa chakhte hue

kisī tāntrik kā muntazir hai

ishq kyā hai

savāl ne kaifiyat kā nichoḌ māñgā

tamām-tar be-sar-o-sāmānī ikaTThī kar ke

namkīn paanī

rā.igānī kī kahānī likh rahā thā

vajūd ko vajūd meñ fanā karne kā gur aa jaa.e

to falsafa-e-ishq vajūd meñ aatā hai

paikar-e-jamāl shāhzādī kī āñkheñ

zard rang kā havāla banīñ

to dard ke ik na.e naam kī taḳhlīq huī

migraine kā ilaaj abhī daryāft nahīñ ho sakā

dil itni shiddat se dhaDka

ki aankh ko dard ka qatra

siyah dikhana paDa

zindagi ki zang-alud

zanjiron mein jakDa wajud

aaKHiri shab ka

zaiqa chakhte hue

kisi tantrik ka muntazir hai

ishq kya hai

sawal ne kaifiyat ka nichoD manga

tamam-tar be-sar-o-samani ikaTThi kar ke

namkin pani

raigani ki kahani likh raha tha

wajud ko wajud mein fana karne ka gur aa jae

to falsafa-e-ishq wajud mein aata hai

paikar-e-jamal shahzadi ki aankhen

zard rang ka hawala banin

to dard ke ek nae nam ki taKHliq hui

migraine ka ilaj abhi daryaft nahin ho saka