mere ham-nafas

mire ham-nafas koī zikr ho

mire dard-o-ġham mire haal kā

mirī aañkh to hai lahū lahū

mirā hausla hai kamāl kā

ye judā.iyoñ ke 'azāb bhī

mirī har ḳhushī ko nigal ga.e

vo jo dil se mere qarīb the

vahī raah apnī badal ga.e

vo jo mahfileñ thiiñ ujaḌ ga.iiñ

vo jo qahqahe the bikhar ga.e

vo jo zaḳhm-e-dil thā nihāñ huā

vo jo giit the kahāñ gum hue

ye nidā-e-'ishq kā shor bhī

yuuñ ragoñ meñ merī utar gayā

tirī diid kā thā maiñ muntazir

tahī-dast thā be-samar rahā

tire shahr-e-ḳhāna-ḳharāb meñ

hameñ phir mileñ na vo fursateñ

vo sharārateñ vo latāfateñ

vo maze maze kī hikāyateñ

ik māhī-e-be-āb huuñ

vo jo Dhal chukā hai shabāb huuñ

use vaqt ne hai bahā diyā

mujhe ġham meñ jiinā sikhā diyā

vo jo soz terī navā meñ thā

mire jism-o-jāñ meñ basā huā

mire ham-suḳhan tū qarīb aa

ye jo fāsle haiñ unheñ miTā

na.e giit likh na.ī baat kar

huī shā'irī jo tujhe 'atā

ye jo nafratoñ ko zavāl hai

ye to shā'irī kā kamāl hai

mire ham-nafas koī zikr ho

mire dard-o-ġham mire haal kā

mirī aañkh to hai lahū lahū

mirā hausla hai kamāl kā

mere ham-nafas koi zikr ho

mere dard-o-gham mere haal ka

meri aankh to hai lahu lahu

mera hausla hai kamal ka

ye judaiyon ke 'azab bhi

meri har KHushi ko nigal gae

wo jo dil se mere qarib the

wahi rah apni badal gae

wo jo mahfilen thin ujaD gain

wo jo qahqahe the bikhar gae

wo jo zaKHm-e-dil tha nihan hua

wo jo git the kahan gum hue

ye nida-e-'ishq ka shor bhi

yun ragon mein meri utar gaya

teri did ka tha main muntazir

tahi-dast tha be-samar raha

tere shahr-e-KHana-KHarab mein

hamein phir milen na wo fursaten

wo shararaten wo latafaten

wo maze maze ki hikayaten

ek mahi-e-be-ab hun

wo jo Dhal chuka hai shabab hun

use waqt ne hai baha diya

mujhe gham mein jina sikha diya

wo jo soz teri nawa mein tha

mere jism-o-jaan mein basa hua

mere ham-suKHan tu qarib aa

ye jo fasle hain unhen miTa

nae git likh nai baat kar

hui sha'iri jo tujhe 'ata

ye jo nafraton ko zawal hai

ye to sha'iri ka kamal hai

mere ham-nafas koi zikr ho

mere dard-o-gham mere haal ka

meri aankh to hai lahu lahu

mera hausla hai kamal ka