mohabbat ka ek sal

is ik saal meñ

kitne saal guzāreñge ham

har ik din, ik saal misāl

har ik din kī sub.h kā sūraj harf-e-savāl

har ik din kī jhulsī huī aur bhīgī huī dopahr zavāl

har ik din kii, har ik shaam shām-e-jamāl

har ik shaam kī raat kamāl

vasl ke har ik lamhe meñ haiñ jaise sadiyāñ ghulī huī

hijr ke har lamhe meñ jaise

halkī aañch pe ret kī dhaḌyāñ bhunī huī

siine meñ har dhaḌkan, jaise

cholastānī uuñT kī gardan meñ hoñ Tali.yāñ bañdhī huī

āñkhoñ kī do jhīloñ meñ haiñ

kañval malāl ke khile hue

hoñT aapas meñ mile hue

hichkiyoñ meñ haiñ bañdhe hue

saañs kī phāñs hai saale sūraj ke siine meñ gaḌī huī

chāñd harām-udahar, samundar goTh ke andar

barfoñ barfoñ dhañsā huā

din aur raat bhī

nañg-dhaḌañge ik duuje se lage hue

un ke pāñv-tale miTTī hai

aur na sar par Topī hai

vaqt aane vaale barsoñ ke ḳhalā meñ chaltā jaatā hai

ye ik saal mohabbat kā

thame hue din raat ke nañge-pan par jamtā jaatā hai

is ek sal mein

kitne sal guzarenge hum

har ek din, ek sal misal

har ek din ki subh ka suraj harf-e-sawal

har ek din ki jhulsi hui aur bhigi hui dopahr zawal

har ek din ki, har ek sham sham-e-jamal

har ek sham ki raat kamal

wasl ke har ek lamhe mein hain jaise sadiyan ghuli hui

hijr ke har lamhe mein jaise

halki aanch pe ret ki dhaDyan bhuni hui

sine mein har dhaDkan, jaise

cholastani unT ki gardan mein hon Taliyan bandhi hui

aankhon ki do jhilon mein hain

kanwal malal ke khile hue

honT aapas mein mile hue

hichkiyon mein hain bandhe hue

sans ki phans hai sale suraj ke sine mein gaDi hui

chand haram-udahar, samundar goTh ke andar

barfon barfon dhansa hua

din aur raat bhi

nang-dhaDange ek duje se lage hue

un ke panw-tale miTTi hai

aur na sar par Topi hai

waqt aane wale barson ke KHala mein chalta jata hai

ye ek sal mohabbat ka

thame hue din raat ke nange-pan par jamta jata hai