mohabbat mar nahin sakti

mohabbat mar nahīñ saktī

haqīqat phir haqīqat hai haqīqat mar nahīñ saktī

ḳhudāvand-e-mohabbat kī sharī.at mar nahīñ saktī

mohabbat mar nahīñ saktī

bahar-sū jabr-o-istibdād chāhe sūliyāñ gaaḌe

utar aa.eñ balā.eñ haath meñ zahrāb le le kar

fazā bārūd ban kar bhī sulag uThe to kyā hogā

ye vo jazba hai jo zarroñ ke siine meñ numū paa.e

ye vo naġhma hai jo zaḳhmoñ ke hoñToñ se ubhartā hai

mohabbat husn-e-fitrat hai ye fitrat mar nahīñ saktī

mohabbat mar nahīñ saktī

kamāl-e-fikr-e-tāġhūtī koī tirshūl le aa.e

farā.īn-e-kuhan Dhal jaa.eñ chāhe paikar-e-nau meñ

samundar ko sitamgar-hāth gar tezāb kar Dāleñ

havāoñ meñ halākat-gīriyāñ tahlīl kar Dāleñ

mohabbat nuur hai ālūdgī se jism marte haiñ

mohabbat meñ koī ālūdgī zam ho nahīñ saktī

ye vo quvvat hai jo shaitān se bhī Dar nahīñ saktī

mohabbat mar nahīñ saktī

mohabbat mar nahin sakti

haqiqat phir haqiqat hai haqiqat mar nahin sakti

KHudawand-e-mohabbat ki shariat mar nahin sakti

mohabbat mar nahin sakti

bahar-su jabr-o-istibdad chahe suliyan gaDe

utar aaen balaen hath mein zahrab le le kar

faza barud ban kar bhi sulag uThe to kya hoga

ye wo jazba hai jo zarron ke sine mein numu pae

ye wo naghma hai jo zaKHmon ke honTon se ubharta hai

mohabbat husn-e-fitrat hai ye fitrat mar nahin sakti

mohabbat mar nahin sakti

kamal-e-fikr-e-taghuti koi tirshul le aae

farain-e-kuhan Dhal jaen chahe paikar-e-nau mein

samundar ko sitamgar-hath gar tezab kar Dalen

hawaon mein halakat-giriyan tahlil kar Dalen

mohabbat nur hai aaludgi se jism marte hain

mohabbat mein koi aaludgi zam ho nahin sakti

ye wo quwwat hai jo shaitan se bhi Dar nahin sakti

mohabbat mar nahin sakti