mohabbat mar nahin sakti

vahī be-tābiyāñ dil kī

vahī phirtā huā dariyā

vahī kachchā ghaḌā hai muntazir sach ke musāfir kā

vahī shab kī siyah chādar

chhupī haiñ sāzisheñ jis meñ azīzoñ kī

purāne dostoñ kī ham-jalīsoñ kī

vahī sargoshiyāñ sail-e-sitam kī

vahī manzar

jo hotā hai hamesha rūh-farsā hādsoñ kā pesh-ḳhema sā

vahī saare qarīne saare hiile haiñ baham ab ke

jo ahl-e-dil ko be-manzil banāne kī haiñ tadbīreñ

magar ahl-e-jahāñ ko kyā ḳhabar

kachche ghaḌe par tair kar rāh-e-mohabbat meñ fanā honā

alag se ik kahānī hai

ki ye vo maut hai jis meñ

baqā-e-jāvedānī hai

mohabbat mar nahīñ saktī

mohabbat ġhair-fānī hai

mohabbat ġhair-fānī hai

wahi be-tabiyan dil ki

wahi phirta hua dariya

wahi kachcha ghaDa hai muntazir sach ke musafir ka

wahi shab ki siyah chadar

chhupi hain sazishen jis mein azizon ki

purane doston ki ham-jalison ki

wahi sargoshiyan sail-e-sitam ki

wahi manzar

jo hota hai hamesha ruh-farsa hadson ka pesh-KHema sa

wahi sare qarine sare hile hain baham ab ke

jo ahl-e-dil ko be-manzil banane ki hain tadbiren

magar ahl-e-jahan ko kya KHabar

kachche ghaDe par tair kar rah-e-mohabbat mein fana hona

alag se ek kahani hai

ki ye wo maut hai jis mein

baqa-e-jawedani hai

mohabbat mar nahin sakti

mohabbat ghair-fani hai

mohabbat ghair-fani hai