mudawa ho nahin sakta

mudāvā ho nahīñ saktā

dil-e-sāda

ab is ātish-numā ke sāmne ijz-e-mohabbat kā i.aada ho nahīñ saktā

ye kyā kam hai

ki apne aap tak ko bhuul kar

us husn-e-ḳhud-āgāh kī ḳhātir na jaane kitne roz-o-shab the

jo ham ne ginvā.e the

bahut saare dinoñ kī gaThḌiyāñ thiiñ

jin ko kholā tak na thā ham ne

bas ik tah-ḳhāna-e-umr-e-guzishta meñ

ham in sab gaThḌiyoñ ko Dher karte jā rahe the un ghanī

palkoñ kī ThanDī chhāñv ko mahsūs karne kī tamannā meñ hameñ

ye dhyān kab thā kaun sī gaThḌī meñ kitnā ḳhūbsūrat din

bañdhā hai aur us be-dām din kī sub.h-sāhir kis havā

ke tahat se utrī hai kin phūloñ kī ḳhushbū zeb-e-tan

kar ke savād-e-shab se jhāñkī hai

lab-o-ruḳhsār ko qaus-e-quzah ke rañg dene kī

abas ḳhvāhish meñ ham ko dhyān kab thā kaun sī gaThḌī

maiñ kis din kī dopahar apne tilism-āsār rāzoñ ko sunahrī

dhuup ke thal meñ jagātī hai

chhatoñ par sūkhtī mirchoñ

galī meñ gūñjtī asrār meñ Duubī huī sī ḳhāmushī meñ

kaun se lamhe sulagte haiñ

hameñ ye dhyān kab tak

us tamannā-zār ke pairāhan-e-sad-rañg ke andar bahaktī garm ḳhushbū

ke ḳhirām-e-tāza meñ kho.e huoñ ko dhyān kab thā kaun

se din kī suhānī shaam kin ufuqoñ ko rotī hai

bahut saare dukhoñ ko darmiyān

jo ek sham-e-ārzū thī us ko lo ke sāmne jhuk kar ham us

be-mehr chashm-e-munharif meñ bas zarā sī der ko ik harf kī ta.abīr paḌhnā

chāhte the aur ḳhamīr-e-ishq meñ gūñdhe hue ik ḳhvāb kā iz.hār

karnā chāhte the aur us saarī kahānī meñ hameñ

ye dhyān kab thā kaun sī gaThḌī meñ kis din

kā janāza hai

abhī tah-ḳhāna-e-umr-e-guzashta kā ye darvāza khulā

to dhyān aayā hai ki itnī Dher saarī umr miTTī meñ

milā kar jo ḳhasāra haath aayā hai dobāra ho nahīñ saktā

mudāvā ho nahīñ saktā

dil-e-sāda

ab is ātish-numā ke sāmne ijz-e-mohabbat kā i.aada ho nahīñ saktā

mudawa ho nahin sakta

dil-e-sada

ab is aatish-numa ke samne ijz-e-mohabbat ka iada ho nahin sakta

ye kya kam hai

ki apne aap tak ko bhul kar

us husn-e-KHud-agah ki KHatir na jaane kitne roz-o-shab the

jo hum ne ginwae the

bahut sare dinon ki gaThDiyan thin

jin ko khola tak na tha hum ne

bas ek tah-KHana-e-umr-e-guzishta mein

hum in sab gaThDiyon ko Dher karte ja rahe the un ghani

palkon ki ThanDi chhanw ko mahsus karne ki tamanna mein hamein

ye dhyan kab tha kaun si gaThDi mein kitna KHubsurat din

bandha hai aur us be-dam din ki subh-sahir kis hawa

ke tahat se utri hai kin phulon ki KHushbu zeb-e-tan

kar ke sawad-e-shab se jhanki hai

lab-o-ruKHsar ko qaus-e-quzah ke rang dene ki

abas KHwahish mein hum ko dhyan kab tha kaun si gaThDi

main kis din ki dopahar apne tilism-asar raazon ko sunahri

dhup ke thal mein jagati hai

chhaton par sukhti mirchon

gali mein gunjti asrar mein Dubi hui si KHamushi mein

kaun se lamhe sulagte hain

hamein ye dhyan kab tak

us tamanna-zar ke pairahan-e-sad-rang ke andar bahakti garm KHushbu

ke KHiram-e-taza mein khoe huon ko dhyan kab tha kaun

se din ki suhani sham kin ufuqon ko roti hai

bahut sare dukhon ko darmiyan

jo ek sham-e-arzu thi us ko lo ke samne jhuk kar hum us

be-mehr chashm-e-munharif mein bas zara si der ko ek harf ki tabir paDhna

chahte the aur KHamir-e-ishq mein gundhe hue ek KHwab ka izhaar

karna chahte the aur us sari kahani mein hamein

ye dhyan kab tha kaun si gaThDi mein kis din

ka janaza hai

abhi tah-KHana-e-umr-e-guzashta ka ye darwaza khula

to dhyan aaya hai ki itni Dher sari umr miTTi mein

mila kar jo KHasara hath aaya hai dobara ho nahin sakta

mudawa ho nahin sakta

dil-e-sada

ab is aatish-numa ke samne ijz-e-mohabbat ka iada ho nahin sakta