مفکر کی موت

یہ اک باغی مفکر کا جنازہ ہے

ہلا ڈالا تھا اپنی کافرانہ فکر سے جس نے

یکایک ساری دنیا کو

فقط بیس آدمی ہم راہ ہیں اس کے جنازے کے

زمانہ جس کی قدر و منزلت کرتا تھا اور جس کے خیالوں سے سنورتا تھا

وہ باغی جا رہا ہے آج اکیلا ایک البیلا مسافر تھا

کروڑوں مومنوں پر تھا جو بھاری ایسا کافر تھا

ستارے کیوں چمکتے ہیں دلوں کا ماجرا کیا ہے

ستیزہ خو ہے کیوں انساں محبت کا مزہ کیا ہے

یہ تحقیق اس کا مذہب تھا

ہزاروں سال نرگس اپنی بے نوری پہ روئے گی