muhajir parinde ka safar

jahāñ pe ḳhatm ho

aisā safar nahīñ aayā

vo tīrgī hai ki

kuchh bhī nazar nahīñ aayā

vo raushnī hai ki

chashm-e-ġhazāl hairāñ hai

nahīñ hai taab ki

dekhe zarā bhī sū-e-falak

kahāñ se aa.ī hai

rū-e-zamīñ pe aisī chamak

ye rocketoñ ke dhamāke

ye asrī missile

gumāñ hai samt-e-samundar

badal ke rakh deñge

hare bhare sabhī manzar

badal ke rakh deñge

fasīl-e-jism kī dīvār

Dhā ke rakh deñge

ye ġham alag hai ki

vo ābshār suukh gayā

ki jis se miltī thī

jangal kī zindagī ko numū

fazā meñ duur talak

phailī huī hai kaisī bū

guloñ ke hoñT se

ab tak farār hai ḳhushbū

ye māntā huuñ ki

zauq-e-junūñ kī sarhad pe

abhī bhī

hijr kī parchhā.iyāñ

sulagtī haiñ

abhī bhī

dasht meñ kuchh lakḌiyāñ

sulagtī haiñ

ḳhizāñ ke baa'd

chaman meñ bahār aatī hai

alag ye baat kabhī ashk-bār aatī hai

agar ye sach hai to

aisā yaqīn hai mujh ko

tire visāl kā mausam

zarūr aa.egā

abhī udaas hai jangal

lahū lahū hai fazā

mire junūñ kā parinda

abhī muhājir hai

jahāñ pe ḳhatm ho

aisā safar nahīñ aayā

jahan pe KHatm ho

aisa safar nahin aaya

wo tirgi hai ki

kuchh bhi nazar nahin aaya

wo raushni hai ki

chashm-e-ghazal hairan hai

nahin hai tab ki

dekhe zara bhi su-e-falak

kahan se aai hai

ru-e-zamin pe aisi chamak

ye rocketon ke dhamake

ye asri missile

guman hai samt-e-samundar

badal ke rakh denge

hare bhare sabhi manzar

badal ke rakh denge

fasil-e-jism ki diwar

Dha ke rakh denge

ye gham alag hai ki

wo aabshaar sukh gaya

ki jis se milti thi

jangal ki zindagi ko numu

faza mein dur talak

phaili hui hai kaisi bu

gulon ke honT se

ab tak farar hai KHushbu

ye manta hun ki

zauq-e-junun ki sarhad pe

abhi bhi

hijr ki parchhaiyan

sulagti hain

abhi bhi

dasht mein kuchh lakDiyan

sulagti hain

KHizan ke ba'd

chaman mein bahaar aati hai

alag ye baat kabhi ashk-bar aati hai

agar ye sach hai to

aisa yaqin hai mujh ko

tere visal ka mausam

zarur aaega

abhi udas hai jangal

lahu lahu hai faza

mere junun ka parinda

abhi muhajir hai

jahan pe KHatm ho

aisa safar nahin aaya