mujhe ek nazm likhni hai

mujhe ik nazm likhnī hai

magar tum par nahīñ likhnī

pareshāñ huuñ bahut din se

magar jab likhnā chāhūñ to

tumhārā hī tasavvur hai

mire is dil-mohalle meñ

tumhārī yaad ke jugnū

musalsal jagmagāte haiñ

mire zehn-o-gumāñ kī sab

hī dīvāreñ abhī tak un

charāġhoñ se charāġhāñ haiñ

jo us tārīk shab meñ tum

jalā kar bhuul aa.e the

suno ab in charāġhoñ se

mirī ye ruuh jaltī hai

tumheñ ye bhī patā hai ki

mujhe jaltī huī shai ko

bujhānā tak nahīñ aatā

ki jaise ek din tum ne

mirī jaltī huī cigarette ko

apne paañv ke nīche

masal kar ke bujhāyā thā

jise ab tak jalāne kī

maiñ himmat kar nahīñ paayā

to kyā aise hī tum phir se

mire zehn-o-gumāñ meñ jal

rahe in apnī yādoñ ke

charāġhoñ ko havā de kar

bujhā doge

mujhe ek nazm likhni hai

magar tum par nahin likhni

pareshan hun bahut din se

magar jab likhna chahun to

tumhaara hi tasawwur hai

mere is dil-mohalle mein

tumhaari yaad ke jugnu

musalsal jagmagate hain

mere zehn-o-guman ki sab

hi diwaren abhi tak un

charaghon se charaghan hain

jo us tarik shab mein tum

jala kar bhul aae the

suno ab in charaghon se

meri ye ruh jalti hai

tumhein ye bhi pata hai ki

mujhe jalti hui shai ko

bujhana tak nahin aata

ki jaise ek din tum ne

meri jalti hui cigarette ko

apne panw ke niche

masal kar ke bujhaya tha

jise ab tak jalane ki

main himmat kar nahin paya

to kya aise hi tum phir se

mere zehn-o-guman mein jal

rahe in apni yaadon ke

charaghon ko hawa de kar

bujha doge