mujhe uDte parinde achchhe lagte hain

mujhe uḌte parinde achchhe lagte haiñ

sharārat se kabhī ye āsmāñ ko chhū kar aate haiñ

kabhī bādal meñ chhupte haiñ

sitāroñ ke shanāsā

chāñd se un kī rifāqat hai

ye nā-ma.alūm aur an-dekhī duniyāoñ ke vāqif

ham se zyāda jānte haiñ

āsmāñ ke baare meñ

vus.at ke baare meñ

mujhe uḌte parinde achchhe lagte haiñ

fazā kī be-karāñ vus.at meñ

ye uḌte parinde raqs karte haiñ

to lagtā hai ki jaise zindagī kā husn

in ke bāzuoñ

in ke paroñ meñ qaid hai

ye uḌte haiñ

na zanjīr-e-girāñ hai koī paañv meñ

na gardan meñ koī tauq-e-ġhulāmī hai

ki jo insān kī ḳhud-dārī ye

insāniyat pe

zarb-e-kārī

ek la.anat hai

ye uḌte haiñ

fazā meñ husn kī tasvīr bantī hai

ajab tahrīr bantī hai

ki jis meñ ḳhvāb mere haiñ

ye ḳhvāb āzādī ke

vus.at

farāz-e-zindagī ke

zindagī ke husn ke haiñ

aur āzādī

jo vus.at hai

farāz-e-zindagī hai

husn hai

jo parindoñ ke paroñ meñ saañs letī hai

mujhe uḌte parinde achchhe lagte haiñ

mujhe uDte parinde achchhe lagte hain

shararat se kabhi ye aasman ko chhu kar aate hain

kabhi baadal mein chhupte hain

sitaron ke shanasa

chand se un ki rifaqat hai

ye na-malum aur an-dekhi duniyaon ke waqif

hum se zyaada jaante hain

aasman ke bare mein

wusat ke bare mein

mujhe uDte parinde achchhe lagte hain

faza ki be-karan wusat mein

ye uDte parinde raqs karte hain

to lagta hai ki jaise zindagi ka husn

in ke bazuon

in ke paron mein qaid hai

ye uDte hain

na zanjir-e-giran hai koi panw mein

na gardan mein koi tauq-e-ghulami hai

ki jo insan ki KHud-dari ye

insaniyat pe

zarb-e-kari

ek lanat hai

ye uDte hain

faza mein husn ki taswir banti hai

ajab tahrir banti hai

ki jis mein KHwab mere hain

ye KHwab aazadi ke

wusat

faraaz-e-zindagi ke

zindagi ke husn ke hain

aur aazadi

jo wusat hai

faraaz-e-zindagi hai

husn hai

jo parindon ke paron mein sans leti hai

mujhe uDte parinde achchhe lagte hain