munni tere dant kahan hain

bachpan meñ jo nazm paḌhī thī maiñ ne ek risāle meñ

unvāñ us kā basā huā hai ab tak yaad ke jaale meñ

munnī se pūchhā thā kisī ne munnī tere daañt kahāñ haiñ

us kī bholī-bhālī bāteñ dekho bachcho darj yahāñ haiñ

be-dāñtoñ kā muñh munnī ne thoḌā sā phir kholā thā

aañsū bhar ke āñkhoñ meñ phir dukhiyārī ne bolā thā

daañt jo maiñ ne saat baras meñ duudh pilā kar paale the

in ko le ga.e chūhe jo sab lambī moñchhoñ vaale the

patjhaḌ kī ye rut thī lekin chand dinoñ aur rātoñ kī

ug aa.ī thī ek laḌī phir motī jaise dāñtoñ kī

jab naanī daadī ko dekhā to ham par ye raaz khulā

hotā hai ik baar hī bachcho jo kuchh is ke saath huā

saat baras ke daañt gireñ to be-shak vo ug jaate haiñ

lekin saaTh baras ke hoñ to lauT ke phir kab aate haiñ

bachpan mein jo nazm paDhi thi main ne ek risale mein

unwan us ka basa hua hai ab tak yaad ke jale mein

munni se puchha tha kisi ne munni tere dant kahan hain

us ki bholi-bhaali baaten dekho bachcho darj yahan hain

be-danton ka munh munni ne thoDa sa phir khola tha

aansu bhar ke aankhon mein phir dukhiyari ne bola tha

dant jo main ne sat baras mein dudh pila kar pale the

in ko le gae chuhe jo sab lambi monchhon wale the

patjhaD ki ye rut thi lekin chand dinon aur raaton ki

ug aai thi ek laDi phir moti jaise danton ki

jab nani dadi ko dekha to hum par ye raaz khula

hota hai ek bar hi bachcho jo kuchh is ke sath hua

sat baras ke dant giren to be-shak wo ug jate hain

lekin saTh baras ke hon to lauT ke phir kab aate hain