muqaffal chup

maiñ ki guftār kā māhir thā jahāñ-dīda thā

log sunte the mirī aur sunāte bhī the

apne dukh-dard meñ Duubī huī saarī bāteñ

mas.ala kaun sā aisā thā jise hal na kiyā

aaj bhī bhiiḌ thī logoñ kī mire chāroñ-taraf

maiñ ne har ek ko bātoñ meñ sukūñ-yāb kiyā

phir koī duur se detā hai sadā kaun ho tum

aa.e ho kaun sī nagrī se zarā naam to lo

naam to maiñ ne batāyā use fauran apnā

aur maiñ kaun huuñ aayā huuñ maiñ kis nagrī se

maiñ ne jab ḳhud se ye pūchhā to musalsal chup thī

chāroñ-atrāf meñ sadiyoñ kī muqaffal chup thī

main ki guftar ka mahir tha jahan-dida tha

log sunte the meri aur sunate bhi the

apne dukh-dard mein Dubi hui sari baaten

masala kaun sa aisa tha jise hal na kiya

aaj bhi bhiD thi logon ki mere chaaron-taraf

main ne har ek ko baaton mein sukun-yab kiya

phir koi dur se deta hai sada kaun ho tum

aae ho kaun si nagri se zara nam to lo

nam to main ne bataya use fauran apna

aur main kaun hun aaya hun main kis nagri se

main ne jab KHud se ye puchha to musalsal chup thi

chaaron-atraf mein sadiyon ki muqaffal chup thi