murajat

dahakte sūraj kā surḳh chehra

lapeT kar rakh diyā gayā hai

ḳhalā meñ sayyāre bikhre bikhre haiñ

jof-e-aflāk phaT paḌā hai

pahāḌ dhunke hue fazāoñ meñ tairte haiñ

athāh sāgar kaf-e-dahan se sulagte laave

ugal rahe haiñ

koī mire muntashir anāsir ko

phir se pahlā sā ruup de kar

kashāñ kashāñ le chalā hai goyā

jhulas rahā hai badan

mirī haDDiyāñ pighalne lagī haiñ

āñkhoñ meñ dekhne kī sakat salāmat hai

dekhtā huuñ har ek chehre meñ apne chehre kā aks

lekin kisī meñ pahchān kī jhalak tak nahīñ hai

har ek band muTThī meñ purza-hā-e-siyāh thāme

ye sochtā huuñ siyāhiyoñ ko dhulāūñ kaise

mire pas-e-pusht kaale aurāq

tez nazroñ kī zad meñ larzīda dam-ba-ḳhud haiñ

maiñ chīḳh uThtā huuñ

merī āvāz mere siine meñ ghuT rahī hai

maiñ haath uThātā huuñ

haath shal haiñ

duhā.ī detā huuñ

sunñe vaalā mire sivā koī bhī nahīñ hai

hazāroñ hamdam karoḌoñ ham-shakl haiñ

magar koī bhī nahīñ hai

dahakte suraj ka surKH chehra

lapeT kar rakh diya gaya hai

KHala mein sayyare bikhre bikhre hain

jof-e-aflak phaT paDa hai

pahaD dhunke hue fazaon mein tairte hain

athah sagar kaf-e-dahan se sulagte lawe

ugal rahe hain

koi mere muntashir anasir ko

phir se pahla sa rup de kar

kashan kashan le chala hai goya

jhulas raha hai badan

meri haDDiyan pighalne lagi hain

aankhon mein dekhne ki sakat salamat hai

dekhta hun har ek chehre mein apne chehre ka aks

lekin kisi mein pahchan ki jhalak tak nahin hai

har ek band muTThi mein purza-ha-e-siyah thame

ye sochta hun siyahiyon ko dhulaun kaise

mere pas-e-pusht kale auraq

tez nazron ki zad mein larzida dam-ba-KHud hain

main chiKH uThta hun

meri aawaz mere sine mein ghuT rahi hai

main hath uThata hun

hath shal hain

duhai deta hun

sunne wala mere siwa koi bhi nahin hai

hazaron hamdam karoDon ham-shakl hain

magar koi bhi nahin hai