musafir

hai apnī āḳhirī manzil shafaq-zāroñ kī vaadī meñ

jahāñ hotā hai āvāra tabassum lāla-zāroñ meñ

jahāñ gītoñ kī pariyāñ kheltī haiñ ābshāroñ meñ

jahāñ mastī meñ aa kar phuul ḳhushbūeñ luTāte haiñ

jahāñ chashme mohabbat ke ḳhudā ke giit gaate haiñ

jahāñ har sū fazā par ḳhūbsūrat ḳhvāb chhā.e haiñ

jahāñ sehn-e-chaman meñ abr ke rangīn saa.e haiñ

jahāñ chashmoñ kī lahroñ par masarrat raqs kartī hai

jahāñ kī zindagī husn aur naġhmoñ meñ guzartī hai

jahāñ apnā gayā-guzrā zamāna yaad aatā hai

jahāñ biitā huā rangīñ fasāna yaad aatā hai

baḌhe jaatā huuñ nā-ma.alūm naġhmoñ kī sadāoñ meñ

koī mujh ko liye jaatā hai un rangīñ fazāoñ meñ

mujhe is chāñd aur tāroñ kī bastī se guzarnā hai

mujhe qaus-e-quzah kī vādiyoñ meñ sair karnā hai

havā.eñ raqs kartī haiñ fazā.eñ muskurātī haiñ

sadā.eñ aa rahī haiñ jaise pariyāñ mil ke gaatī haiñ

shafaq-zāroñ kī vaadī niiñd aur ḳhvāboñ kī vaadī hai

shafaq zāroñ kī vaadī husn aur naġhmoñ kī vaadī hai

hai apnī āḳhirī manzil shafaq-zāroñ kī vaadī meñ

hai apni aaKHiri manzil shafaq-zaron ki wadi mein

jahan hota hai aawara tabassum lala-zaron mein

jahan giton ki pariyan khelti hain aabshaaron mein

jahan masti mein aa kar phul KHushbuen luTate hain

jahan chashme mohabbat ke KHuda ke git gate hain

jahan har su faza par KHubsurat KHwab chhae hain

jahan sehn-e-chaman mein abr ke rangin sae hain

jahan chashmon ki lahron par masarrat raqs karti hai

jahan ki zindagi husn aur naghmon mein guzarti hai

jahan apna gaya-guzra zamana yaad aata hai

jahan bita hua rangin fasana yaad aata hai

baDhe jata hun na-malum naghmon ki sadaon mein

koi mujh ko liye jata hai un rangin fazaon mein

mujhe is chand aur taron ki basti se guzarna hai

mujhe qaus-e-quzah ki wadiyon mein sair karna hai

hawaen raqs karti hain fazaen muskuraati hain

sadaen aa rahi hain jaise pariyan mil ke gati hain

shafaq-zaron ki wadi nind aur KHwabon ki wadi hai

shafaq zaron ki wadi husn aur naghmon ki wadi hai

hai apni aaKHiri manzil shafaq-zaron ki wadi mein