muTThi se phisalti nirwan ki ret

siddhārth

aaj to sadiyoñ kī hairānī liye in pattharoñ kī qaid sahtā hai

paḌī hai dhuul jin par an-ginat ohdoñ ke rastoñ kī

ayaañ haiñ kis qadar gahrī darāḌeñ jin pe vaqtoñ kī

to āñkheñ band kar ke aaj bhī

irfān ke anjān lamhe ke fusūñ meñ hai

ye tere shānt chehre par tabassum khiltā jaatā hai

vahī lamha

ki jis kī justujū meñ tū ghane jangal ke andar gum rahā barsoñ

magar paayā to kyā paayā

faqat nirvān kī ek ḳhushk sī Tahnī

jise tū ye samajh baiThā

ki ye hai qasr-e-māyā kī koī nāyāb sī kunjī

buḌhāpā maut bīmārī kā dukh tujh par abhī tak khilkhilātā hai

jise tū chhoḌ kar bastī se bhāgā thā

siddhārth

apnī āñkheñ khol

apne man ke kāġhaz par likhī duniyā se bāhar aa

jahāñ patjhaḌ kā mausam hai

jahāñ par barf girtī hai

vo bargad jis kī chhāyā meñ tū apne ḳhvāb buntā thā

vahī jangal

ki jis meñ shāñtī ke phuul khilte the

vo sab kuchh kaT chukā hai

ab vahāñ ik shahr phailā hai

tire nirvān ke lamhe se jis kā fāsla hai tiis sadiyoñ kā

kapilvastu ke shahzāde

tū bhūkā hai

tire kamzor se tan par koī kapḌā nahīñ hai

aur bāhar ThanD hai

aur haath meñ sikka nahīñ koī

chal uTh

tujh ko kisī mill meñ kahīñ naukar karā aa.uuñ

siddhaarth

aaj to sadiyon ki hairani liye in pattharon ki qaid sahta hai

paDi hai dhul jin par an-ginat ohdon ke raston ki

ayan hain kis qadar gahri daraDen jin pe waqton ki

to aankhen band kar ke aaj bhi

irfan ke anjaan lamhe ke fusun mein hai

ye tere shant chehre par tabassum khilta jata hai

wahi lamha

ki jis ki justuju mein tu ghane jangal ke andar gum raha barson

magar paya to kya paya

faqat nirwan ki ek KHushk si Tahni

jise tu ye samajh baiTha

ki ye hai qasr-e-maya ki koi nayab si kunji

buDhapa maut bimari ka dukh tujh par abhi tak khilkhilata hai

jise tu chhoD kar basti se bhaga tha

siddhaarth

apni aankhen khol

apne man ke kaghaz par likhi duniya se bahar aa

jahan patjhaD ka mausam hai

jahan par barf girti hai

wo bargad jis ki chhaya mein tu apne KHwab bunta tha

wahi jangal

ki jis mein shanti ke phul khilte the

wo sab kuchh kaT chuka hai

ab wahan ek shahr phaila hai

tere nirwan ke lamhe se jis ka fasla hai tis sadiyon ka

kapilwastu ke shahzade

tu bhuka hai

tere kamzor se tan par koi kapDa nahin hai

aur bahar ThanD hai

aur hath mein sikka nahin koi

chal uTh

tujh ko kisi mill mein kahin naukar kara aaun