na rahne ka dukh

ik aisā lamha aa.egā

jab kāñpegī shāḳhoñ par rañgoñ kī lau

aur ḳhushbū mar jā.egī

jin āñkhoñ ne sab samtoñ par phailī huī niilī chādar ko

aur sūraj ko dekhā hogā

aur sitāre dekhe hoñge

aur ye duniyā

insānoñ se ladī huī ma.asūm sī duniyā dekhī hogī

vo na raheñgī

diloñ ke andar basne vaale jazbe thak kar socheñge

jitnī bhī kaifiyateñ haiñ

saarī mayyateñ ban jā.eñgī

tū na rahegī

maiñ na hūñgā

ham donoñ ne mil kar jitne peḌ lagā.e

vo na raheñge

kuchh na rahegā

na rahne ke dukh ke sivā

ek aisa lamha aaega

jab kanpegi shaKHon par rangon ki lau

aur KHushbu mar jaegi

jin aankhon ne sab samton par phaili hui nili chadar ko

aur suraj ko dekha hoga

aur sitare dekhe honge

aur ye duniya

insanon se ladi hui masum si duniya dekhi hogi

wo na rahengi

dilon ke andar basne wale jazbe thak kar sochenge

jitni bhi kaifiyaten hain

sari mayyaten ban jaengi

tu na rahegi

main na hunga

hum donon ne mil kar jitne peD lagae

wo na rahenge

kuchh na rahega

na rahne ke dukh ke siwa