na tum qarib aao

mire ḳhayāl pe jaise ki chhā ga.e ho tum

dil-o-nigāh meñ goyā samā ga.e ho tum

ik ajnabī ho magar paas aa ga.e ho tum

na jaane kaun sā jaadū jagā ga.e ho tum

ḳhudā ke vāste itnā na tum qarīb aao

tumhārī sāñvlī sūrat meñ shām-e-hijrāñ hai

udaas āñkhoñ meñ kuchh vahshat-e-ġhazālāñ hai

laboñ pe shikva-e-ḳhāmosh ranj-e-daurāñ hai

qarīb-e-dil mire jaise koī ġhazal-ḳhvāñ hai

ḳhudā ke vāste itnā na tum qarīb aao

maiñ ḳhud huuñ ābla-pā kam-nasīb ḳhāk-basar

hai merī bazm farozāñ ba-faiz-e-dāġh-e-jigar

bhalā kahāñ maiñ kahāñ fursat-e-fareb-e-nazar

hai phir bhī ḳhvāhish-e-dīdār aur dīda-e-tar

ḳhudā ke vāste itnā na tum qarīb aao

ye qurb-e-rūh bhī kitnā 'ajab mu'ammā hai

sukūn-e-dil bhī hai aur dard-e-be-mudāvā hai

kisī janam kī mohabbat kā kyā ye tohfa hai

ki ḳhvāb meñ bhī zabāñ par tumhārā qissa hai

ḳhudā ke vāste itnā na tum qarīb aao

mere KHayal pe jaise ki chha gae ho tum

dil-o-nigah mein goya sama gae ho tum

ek ajnabi ho magar pas aa gae ho tum

na jaane kaun sa jadu jaga gae ho tum

KHuda ke waste itna na tum qarib aao

tumhaari sanwli surat mein sham-e-hijran hai

udas aankhon mein kuchh wahshat-e-ghazalan hai

labon pe shikwa-e-KHamosh ranj-e-dauran hai

qarib-e-dil mere jaise koi ghazal-KHwan hai

KHuda ke waste itna na tum qarib aao

main KHud hun aabla-pa kam-nasib KHak-basar

hai meri bazm farozan ba-faiz-e-dagh-e-jigar

bhala kahan main kahan fursat-e-fareb-e-nazar

hai phir bhi KHwahish-e-didar aur dida-e-tar

KHuda ke waste itna na tum qarib aao

ye qurb-e-ruh bhi kitna 'ajab mu'amma hai

sukun-e-dil bhi hai aur dard-e-be-mudawa hai

kisi janam ki mohabbat ka kya ye tohfa hai

ki KHwab mein bhi zaban par tumhaara qissa hai

KHuda ke waste itna na tum qarib aao