na-malum ka zarar

maiñ nahīñ jāntī

ki mujhe kyā huā hai

mujhe aisā kuchh bhī

mere baare batāne se man.a kiyā gayā hai

shāyad

magar maiñ taklīf meñ huuñ

ek anjānī taklīf

nā-chāhe jaane kī taklīf

maiñ kisī kī zindagī kā mehvar-o-markaz nahīñ kyuuñ

shāyad ye kyuuñ aur is se pahle kā jumla faqat merā vahm ho

yahī soch kar ḳhud ko tasallī denā bhī

kis qadar achchhā lagtā hai

mere ba.ad kitne log

merī maut kā yaqīn na kar pā.eñge

mere hote hue kitnoñ ko mere zinda hone kā yaqīn hai

kyā ye yaqīn jhūTā nahīñ

kyā har yaqīn jhūTā nahīñ

nahīñ sab sach hai

kabūtar kī tarah āñkheñ muuñd lene se kyā hogā

udāsī aur us kā karb jaan levā hai

zindagī har roz mujhe zalīl karne par tulī hai

sisaknā bilaknā aur qahqahe lagānā merā vatīra ban gayā hai

koī hai jo mujhe ḳhvāboñ se bedār na kare

koī hai

koī nahīñ

maiñ ḳhud bhī nahīñ

tumheñ patā hai tumhārī āñkheñ

mere chehre par burī lagtī haiñ

par maiñ unheñ lagā.e ghūmtī huuñ

bhaddī lagne ke bāvajūd

sirf is liye ki

tumheñ mujh se shikāyat na ho

ye kaisā zindāñ hai jahāñ āzādī hī āzādī hai aur koī rok Tok nahīñ

sivā.e sochne ke

kisī shai par pābandī nahīñ

main nahin jaanti

ki mujhe kya hua hai

mujhe aisa kuchh bhi

mere bare batane se mana kiya gaya hai

shayad

magar main taklif mein hun

ek anjaani taklif

na-chahe jaane ki taklif

main kisi ki zindagi ka mehwar-o-markaz nahin kyun

shayad ye kyun aur is se pahle ka jumla faqat mera wahm ho

yahi soch kar KHud ko tasalli dena bhi

kis qadar achchha lagta hai

mere baad kitne log

meri maut ka yaqin na kar paenge

mere hote hue kitnon ko mere zinda hone ka yaqin hai

kya ye yaqin jhuTa nahin

kya har yaqin jhuTa nahin

nahin sab sach hai

kabutar ki tarah aankhen mund lene se kya hoga

udasi aur us ka karb jaan lewa hai

zindagi har roz mujhe zalil karne par tuli hai

sisakna bilakna aur qahqahe lagana mera watira ban gaya hai

koi hai jo mujhe KHwabon se bedar na kare

koi hai

koi nahin

main KHud bhi nahin

tumhein pata hai tumhaari aankhen

mere chehre par buri lagti hain

par main unhen lagae ghumti hun

bhaddi lagne ke bawajud

sirf is liye ki

tumhein mujh se shikayat na ho

ye kaisa zindan hai jahan aazadi hi aazadi hai aur koi rok Tok nahin

siwae sochne ke

kisi shai par pabandi nahin