na-qabil-e-ishaat

merī ye nazm shaa.e nahīñ ho saktī

ye ishā.at ke qābil nahīñ

is meñ shāmil hai gahrā dukh

ham sab kā mushtarka dukh

jise mahsūs kiyā jā saktā hai

bayān nahīñ

ehtijāj aur mazammat is ke lafzoñ meñ na.ara-zan

aañsū aur aaheñ is kā dariyā

sat.h pe bah jaatī hai siskī lekin

maiñ ye nazm dīvār par kaise likhūñ

ki har dīvār huī hai bahrī

ab ye paisoñ kā

chand Takoñ kā

khokhlā gūñgā iz.hār ho ga.iiñ haiñ mahz

un par likhā koī nahīñ paḌhtā

maiñ ye nazm dard ke samundar meñ

pheñk dūñgā

yā TukḌe TukḌe kar dūñgā

yā jalā dūñgā

maiñ ise shaa.e nahīñ hone dūñgā

hargiz

shaa.e huī to sharīk ho jā.eñge

is meñ sab

mohabbat karne jānñe aur samajhne vaale

sab ke sab

phir bhī maiñ likhūñgā zarūr

ki nazm hī hai merā ehtijāj

mazammat

na.ara

aur mohabbat

maiñ ḳhāmoshī aur khule andhe-pan ke māhaul meñ

ek nazm likkhūñgā zarūr

meri ye nazm shae nahin ho sakti

ye ishaat ke qabil nahin

is mein shamil hai gahra dukh

hum sab ka mushtarka dukh

jise mahsus kiya ja sakta hai

bayan nahin

ehtijaj aur mazammat is ke lafzon mein nara-zan

aansu aur aahen is ka dariya

sath pe bah jati hai siski lekin

main ye nazm diwar par kaise likhun

ki har diwar hui hai bahri

ab ye paison ka

chand Takon ka

khokhla gunga izhaar ho gain hain mahz

un par likha koi nahin paDhta

main ye nazm dard ke samundar mein

phenk dunga

ya TukDe TukDe kar dunga

ya jala dunga

main ise shae nahin hone dunga

hargiz

shae hui to sharik ho jaenge

is mein sab

mohabbat karne jaanne aur samajhne wale

sab ke sab

phir bhi main likhunga zarur

ki nazm hi hai mera ehtijaj

mazammat

nara

aur mohabbat

main KHamoshi aur khule andhe-pan ke mahaul mein

ek nazm likkhunga zarur