nam jo likha nahin tha

mirī jaañ ye muddat se maiñ jāntī huuñ

tumhārā ye dil koī patthar nahīñ hai

dhaḌaktā to hai is kī dhaḌkan meñ lekin

kahīñ koī lamha mire naam par ḳhatm hotā nahīñ hai

tumhārī ye āñkheñ chhalaktī haiñ lekin

ye aañsū jo palkoñ pe Thahre haiñ in meñ

koī bhī to merī judā.ī meñ Tapkā nahīñ hai

base haiñ ka.ī ḳhvāb in meñ ye sach hai

magar ek bhī ḳhvāb mere tasavvur se ābād kab hai

tumhāre laboñ par ye naġhme bhalā kab mirī shaan meñ haiñ

ye maiñ jāntī huuñ kahīñ duur imlī ke ik peḌ kī oT se

koī ūñchī havelī ke koThe se malhār gā kar bulātā hai tum ko

jise sun ke tum muztarib aur bechain hote ho behad

mirī jaan

mujh se ye jhūTī mohabbat kā iz.hār karne pe phir itne majbūr kyoñ ho

maiñ sach kah rahī huuñ

agar lauT kar tum chale bhī ga.e us sadā par mujhe ġham na hogā

buzurgoñ kī ḳhvāhish pe tum ne

mirī maañg meñ ye jo afshāñ bharī hai qasam hai isī kī

ki māthe pe mere tumhārā hī to naam likkhā rahegā

jo mil-jul ke ham ne kabhī bhī kahīñ bhī

kisī peḌ kī jaḌ meñ likkhā nahīñ thā

meri jaan ye muddat se main jaanti hun

tumhaara ye dil koi patthar nahin hai

dhaDakta to hai is ki dhaDkan mein lekin

kahin koi lamha mere nam par KHatm hota nahin hai

tumhaari ye aankhen chhalakti hain lekin

ye aansu jo palkon pe Thahre hain in mein

koi bhi to meri judai mein Tapka nahin hai

base hain kai KHwab in mein ye sach hai

magar ek bhi KHwab mere tasawwur se aabaad kab hai

tumhaare labon par ye naghme bhala kab meri shan mein hain

ye main jaanti hun kahin dur imli ke ek peD ki oT se

koi unchi haweli ke koThe se malhaar ga kar bulata hai tum ko

jise sun ke tum muztarib aur bechain hote ho behad

meri jaan

mujh se ye jhuTi mohabbat ka izhaar karne pe phir itne majbur kyon ho

main sach kah rahi hun

agar lauT kar tum chale bhi gae us sada par mujhe gham na hoga

buzurgon ki KHwahish pe tum ne

meri mang mein ye jo afshan bhari hai qasam hai isi ki

ki mathe pe mere tumhaara hi to nam likkha rahega

jo mil-jul ke hum ne kabhi bhi kahin bhi

kisi peD ki jaD mein likkha nahin tha