naseh-e-mushfiq

tum ko āḳhir mere un ke darmiyāñ aane se kyā

mohsin-e-man vo samajh jā.eñge samjhāne se kyā

husn meñ ḳhud-e'timādī ishq meñ be-rah-ravī

vo asar meñ le mire nārāz ho jaane se kyā

aap apne rang meñ haiñ maiñ huuñ apne rang meñ

aap ko ai banda-parvar mere afsāne se kyā

dil ko bahlāne kī koshish aur un se duur duur

dil bahal bhī jā.egā is tarah bahlāne se kyā

ishti.āl-āmez bātoñ se agar zid paḌ ga.ī

aise samjhāne se hāsil aise samjhāne se kyā

mujh ko to ye be-niyāzī be-ruḳhī sab kuchh qubūl

aap ko rāhat milegī mere taḌpāne se kyā

un kā milnā bhī ġhalat tark-e-ta.alluq bhī muhāl

ye hayāt-e-kashmakash bhī kam hai mar jaane se kyā

pahle hī bachnā thā 'naḳhshab' us but-e-be-mehr se

ab bhalā mard-e-ḳhudā hotā hai pachhtāne se kyā

tum ko aaKHir mere un ke darmiyan aane se kya

mohsin-e-man wo samajh jaenge samjhane se kya

husn mein KHud-e'timadi ishq mein be-rah-rawi

wo asar mein le mere naraaz ho jaane se kya

aap apne rang mein hain main hun apne rang mein

aap ko ai banda-parwar mere afsane se kya

dil ko bahlane ki koshish aur un se dur dur

dil bahal bhi jaega is tarah bahlane se kya

ishtial-amez baaton se agar zid paD gai

aise samjhane se hasil aise samjhane se kya

mujh ko to ye be-niyazi be-ruKHi sab kuchh qubul

aap ko rahat milegi mere taDpane se kya

un ka milna bhi ghalat tark-e-talluq bhi muhaal

ye hayat-e-kashmakash bhi kam hai mar jaane se kya

pahle hi bachna tha 'naKHshab' us but-e-be-mehr se

ab bhala mard-e-KHuda hota hai pachhtane se kya