nadi ka afsana

vo nadī jo ki yahāñ roz khilkhilātī hai

azm se jis ke yaañ shādāb haiñ kināre bhī

vo jo sūraj ke nikalne pe bhī chamaktī hai

god meñ apnī jo mahtāb ko jhulātī hai

jis kā mausam ke ishāroñ pe utarnā chaḌhnā

ye batātā rahā kab ḳhush hai vo ġhamgīñ hai kab

phir samundar se mile yā vo baḌe dariyā se

apne uddgam se vo har haal juḌī rahtī hai

sāzisheñ karte rahe mausam-e-garmā aksar

us ne badlī hī nahīñ raah kabhī bhī apnī

par ye hālāt ye tūfān-e-havādis jaise

ban ga.e haiñ sabhī is āb-e-ravāñ ke dushman

dekh kar ab ye manāzir maiñ yahī sochtā huuñ

kitnī miltī hai nadī tujh se kahānī merī

wo nadi jo ki yahan roz khilkhilati hai

azm se jis ke yan shadab hain kinare bhi

wo jo suraj ke nikalne pe bhi chamakti hai

god mein apni jo mahtab ko jhulati hai

jis ka mausam ke ishaaron pe utarna chaDhna

ye batata raha kab KHush hai wo ghamgin hai kab

phir samundar se mile ya wo baDe dariya se

apne uddgam se wo har haal juDi rahti hai

sazishen karte rahe mausam-e-garma aksar

us ne badli hi nahin rah kabhi bhi apni

par ye haalat ye tufan-e-hawadis jaise

ban gae hain sabhi is aab-e-rawan ke dushman

dekh kar ab ye manazir main yahi sochta hun

kitni milti hai nadi tujh se kahani meri