nadi ne kaha

maut dete ho kyoñ zindagī kī tarah

mujh ko jiine do bas ik nadī kī tarah

jhilmilāte himāle se utrī huuñ maiñ

chāhe jaisī huuñ gangā kī beTī huuñ maiñ

mere siine meñ mamtā ke dhāre bhī haiñ

merī bāhoñ meñ kuchh ġham ke maare bhī haiñ

mere pahlū meñ apne sitāre bhī haiñ

merī bāheñ bhī haiñ ye kināre bhī haiñ

dil meñ hai bhāvnā raushnī kī tarah

mujh ko jiine do bas ik nadī kī tarah

nāchtī aur nachātī chalī jā rahī

lai meñ ik giit gaatī chalī jā rahī

kitne tūfāñ uThātī chalī jā rahī

phir bhī taalī bajātī chalī jā rahī

lākhoñ armān mere bhī siine meñ haiñ

qatre shabnam ke mere pasīne meñ haiñ

kal samundar se milnā hai jā ke mujhe

us ko paanā hai ḳhud ko miTā ke mujhe

maut kā ġham milegā ḳhushī kī tarah

mujh ko jiine do bas ik nadī kī tarah

apne sāgar kī ik paak dhārā thī maiñ

niile paanī kī āñkhoñ kā taarā thī maiñ

gandagī kī nazar mujh pe Daalī ga.ī

mere āñchal pe kālakh lagā dī ga.ī

merī lahroñ kā ānand lete rahe

le ke amrit mujhe zahr dete rahe

mujh pe 'panchhī' hī altāf kar degā phir

ye samundar mujhe saaf kar degā phir

jism ho jā.egā chāñdnī kī tarah

mujh ko jiine do bas ik nadī kī tarah

maut dete ho kyoñ zindagī kī tarah

mujh ko jiine do bas ik nadī kī tarah

maut dete ho kyon zindagi ki tarah

mujh ko jine do bas ek nadi ki tarah

jhilmilate himale se utri hun main

chahe jaisi hun ganga ki beTi hun main

mere sine mein mamta ke dhaare bhi hain

meri bahon mein kuchh gham ke mare bhi hain

mere pahlu mein apne sitare bhi hain

meri bahen bhi hain ye kinare bhi hain

dil mein hai bhawna raushni ki tarah

mujh ko jine do bas ek nadi ki tarah

nachti aur nachati chali ja rahi

lai mein ek git gati chali ja rahi

kitne tufan uThati chali ja rahi

phir bhi tali bajati chali ja rahi

lakhon arman mere bhi sine mein hain

qatre shabnam ke mere pasine mein hain

kal samundar se milna hai ja ke mujhe

us ko pana hai KHud ko miTa ke mujhe

maut ka gham milega KHushi ki tarah

mujh ko jine do bas ek nadi ki tarah

apne sagar ki ek pak dhaara thi main

nile pani ki aankhon ka tara thi main

gandagi ki nazar mujh pe Dali gai

mere aanchal pe kalakh laga di gai

meri lahron ka aanand lete rahe

le ke amrit mujhe zahr dete rahe

mujh pe 'panchhi' hi altaf kar dega phir

ye samundar mujhe saf kar dega phir

jism ho jaega chandni ki tarah

mujh ko jine do bas ek nadi ki tarah

maut dete ho kyon zindagi ki tarah

mujh ko jine do bas ek nadi ki tarah