nae sal ki band muTThi

achānak dabe paañv vo aa gayā thā

khulī band muTThī to ye hukm jaarī huā

ham ko lambī masāfat ko jaanā hai lekin

safar ke liye koī vaqfa nahīñ thā

safar ko ba-ujlat ravāna hue is tarah ham

na zād-e-safar thā

na maqsad

na koī irāda

faqat lā-shu.ūrī tarīqe se apne qadam uTh rahe the

bagūle havā.eñ thapeḌe

ujāle añdhere

añdhere ujāle

faqat dhund hī dhund thī duur tak

der tak

ham bhaTakte rahe

thak ga.e phir bhī chalte rahe

thī itā.at-guzārī hī apnā muqaddar

aur is se mafar kā koī rāsta bhī nahīñ thā

safar meñ ka.ī moḌ aise bhī aa.e

jahāñ apne derīna ahbāb ko

bebasī se har ik aan baḌhtī huī dhund meñ Dūbte dekhte rah ga.e

apne bas meñ nahīñ thā

ki ham ḳhud pe laadī huī bebasī

bhaḌaktī huī aag aur ḳhuun kī naddiyoñ se

kisī taur ham hāñpte apnī manzil ko pahuñche

vo manzil kahāñ thī

faqat be-kasī nā-murādī kā anjām thā vo

achānak dabe paañv phir aa gayā hai vahī

apnī muTThī ko saḳhtī se bhīñche hue

kyā pata is meñ phūloñ kī bastī ko jaane kā paiġhām hai

yā kisī vādī-e-ḳhār ko kuuch karne kā farmān koī

faqat tifl-e-nādāñ kī mānind ham

us kī muTThī meñ poshīda ahkām ke pesh haiñ chup kapḌe

aane vaale kisī hādse kā tasavvur liye

ḳhauf se kāñpte haiñ

achanak dabe panw wo aa gaya tha

khuli band muTThi to ye hukm jari hua

hum ko lambi masafat ko jaana hai lekin

safar ke liye koi waqfa nahin tha

safar ko ba-ujlat rawana hue is tarah hum

na zad-e-safar tha

na maqsad

na koi irada

faqat la-shuuri tariqe se apne qadam uTh rahe the

bagule hawaen thapeDe

ujale andhere

andhere ujale

faqat dhund hi dhund thi dur tak

der tak

hum bhaTakte rahe

thak gae phir bhi chalte rahe

thi itaat-guzari hi apna muqaddar

aur is se mafar ka koi rasta bhi nahin tha

safar mein kai moD aise bhi aae

jahan apne derina ahbab ko

bebasi se har ek aan baDhti hui dhund mein Dubte dekhte rah gae

apne bas mein nahin tha

ki hum KHud pe ladi hui bebasi

bhaDakti hui aag aur KHun ki naddiyon se

kisi taur hum hanpte apni manzil ko pahunche

wo manzil kahan thi

faqat be-kasi na-muradi ka anjam tha wo

achanak dabe panw phir aa gaya hai wahi

apni muTThi ko saKHti se bhinche hue

kya pata is mein phulon ki basti ko jaane ka paigham hai

ya kisi wadi-e-KHar ko kuch karne ka farman koi

faqat tifl-e-nadan ki manind hum

us ki muTThi mein poshida ahkaam ke pesh hain chup kapDe

aane wale kisi hadse ka tasawwur liye

KHauf se kanpte hain