nae sal ki subh

rūh-e-insāñ kī javāñ tishna-labī kī ḳhātir

zañg-ālūd tamannāoñ kī zanjīr liye

phir sahar raat ke zindāñ se nikal aa.ī hai

sub.h laa.ī hai ujāloñ kā chhalaktā huā jaam

raat kī āñkhoñ se Tapkā hai sitāroñ kā lahū

tīra-o-tār fazā Duub ga.ī hai ḳhud meñ

duur sūraj kī sulagtī huī aahoñ se pare

merī har fikr kī har soch kī rāhoñ se pare

dil kī āñkhoñ se pare merī nigāhoñ se pare

phir vahī fikr-e-safar fikr-e-talab fikr-e-zavāl

phir vahī tez masā.il vahī ḳhuñḳhār savāl

phir siyah-posh tasavvur kā siyah-posh kamāl

phir uThā.e haiñ tamannāoñ ne ḳhvāboñ ke kafan

phir vahī peT ke mānūs taqāzoñ kī chubhan

phir lahū rotī hai iflās kī madqūq dulhan

rūh-e-insāñ kī javāñ tishna-labī kī ḳhātir

zañg-ālūd tamannāoñ kī zanjīr liye

phir sahar raat ke zindāñ se nikal aa.ī hai

ruh-e-insan ki jawan tishna-labi ki KHatir

zang-alud tamannaon ki zanjir liye

phir sahar raat ke zindan se nikal aai hai

subh lai hai ujalon ka chhalakta hua jam

raat ki aankhon se Tapka hai sitaron ka lahu

tira-o-tar faza Dub gai hai KHud mein

dur suraj ki sulagti hui aahon se pare

meri har fikr ki har soch ki rahon se pare

dil ki aankhon se pare meri nigahon se pare

phir wahi fikr-e-safar fikr-e-talab fikr-e-zawal

phir wahi tez masail wahi KHunKHar sawal

phir siyah-posh tasawwur ka siyah-posh kamal

phir uThae hain tamannaon ne KHwabon ke kafan

phir wahi peT ke manus taqazon ki chubhan

phir lahu roti hai iflas ki madquq dulhan

ruh-e-insan ki jawan tishna-labi ki KHatir

zang-alud tamannaon ki zanjir liye

phir sahar raat ke zindan se nikal aai hai