nai aawaz

kitnī sham.eñ bujh ga.iiñ nūr-e-sahar ke naam par

kitne ġhunche gul hue sehn-e-chaman kī god meñ

kitne bhauñroñ ke laboñ se chhin gayā phūloñ kā ras

kitnī lahreñ dāman-e-sāhil kī zīnat ban ga.iiñ

ik ujāle ke liye kitnī shabeñ vīrāñ huiiñ

kitne naġhme zam hue haiñ hurriyat ke saaz meñ

ik na.e andāz se gulshan meñ phir aa.ī bahār

phir guloñ kī tāzgī gulshan kī zīnat ban ga.ī

jagmagā uTThā achānak phir dayār-e-bebasī

phir nayā māhaul ubhrā phir na.ī mahfil sajī

raushnī to mil ga.ī lekin dhuñdalkoñ kī tarah

bulbuloñ ke vo hayāt-afroz naġhme kyā hue

justujū thī jin ujāloñ kī vo sub.heñ kyā huiiñ

ham samajhte the gulistāñ legā phir añgḌā.iyāñ

sham.a kī lau par na jaane kitne parvāne jale

kitne phūloñ kā tabassum vaqf-e-gulshan ho gayā

kitne naġhme andalībān-e-chaman ke kho ga.e

kitnī maujeñ ho ga.iiñ haiñ vus.at-e-dariyā meñ zam

kitne tāroñ kā lahū Tapkā sahar ke vāste

kitne rangā-rang phūloñ se sajī hai har ravish

andalībān-e-chaman gaane lage naġhme na.e

daf.atan bujhte diye phir se farozāñ ho ga.e

har qadam par ik nayā jaada banā manzil banī

phuul ab bhī khilte haiñ lekin kahāñ aglī sī baat

qumriyoñ ke kaif-āvar vo tarāne haiñ kahāñ

vo manāzir kyā hue jin kī nazar ko hai talāsh

hurriyat kā raqs-e-paiham ḳhuun ko garmā.egā

zindagī badlegī karvaT ik na.e andāz se

dosto kyā kyā tavaqqo thī na.ī āvāz se

kitni shamen bujh gain nur-e-sahar ke nam par

kitne ghunche gul hue sehn-e-chaman ki god mein

kitne bhaunron ke labon se chhin gaya phulon ka ras

kitni lahren daman-e-sahil ki zinat ban gain

ek ujale ke liye kitni shaben viran huin

kitne naghme zam hue hain hurriyat ke saz mein

ek nae andaz se gulshan mein phir aai bahaar

phir gulon ki tazgi gulshan ki zinat ban gai

jagmaga uTTha achanak phir dayar-e-bebasi

phir naya mahaul ubhra phir nai mahfil saji

raushni to mil gai lekin dhundalkon ki tarah

bulbulon ke wo hayat-afroz naghme kya hue

justuju thi jin ujalon ki wo subhen kya huin

hum samajhte the gulistan lega phir angDaiyan

shama ki lau par na jaane kitne parwane jale

kitne phulon ka tabassum waqf-e-gulshan ho gaya

kitne naghme andaliban-e-chaman ke kho gae

kitni maujen ho gain hain wusat-e-dariya mein zam

kitne taron ka lahu Tapka sahar ke waste

kitne ranga-rang phulon se saji hai har rawish

andaliban-e-chaman gane lage naghme nae

dafatan bujhte diye phir se farozan ho gae

har qadam par ek naya jada bana manzil bani

phul ab bhi khilte hain lekin kahan agli si baat

qumriyon ke kaif-awar wo tarane hain kahan

wo manazir kya hue jin ki nazar ko hai talash

hurriyat ka raqs-e-paiham KHun ko garmaega

zindagi badlegi karwaT ek nae andaz se

dosto kya kya tawaqqo thi nai aawaz se