nai purani aag

kis ne dekhā hai ashkoñ ko bahte hue

sone chāñdī ke mahloñ meñ tum jā base

chāhatoñ kī ḳhushī kā chalan chhoḌ kar

dil kī dildāriyoñ kī chubhan chhoḌ kar

ab ye tum hī kaho kaun kis kā nahīñ

kis ke dar tak nahīñ kyoñ kisī kī jabīñ

kis ne toḌā mohabbat ke paimān ko

rog sā lag gayā ruuh ko jaan ko

rang kī ruup kī pyaar kī rāhateñ

aaj mere liye ban ga.iiñ hasrateñ

jaise un se koī vāsta hī na thā

kis ke dāman se uḌtī hai bū-e-vafā

kis liye pyaar kā naam badnām hai

kis liye is jahāñ-bhar meñ kohrām hai

kin rivājoñ ne duniyā meñ bis bo diye

ishq kī deviyāñ devtā ro diye

tum hī apne nahīñ kis se shikve kareñ

ġhair kī aag hai ab ji.eñ yā mareñ

oḌhe phirte haiñ ham hasratoñ kā kafan

ho mubārak tumheñ reshmī pairahan

haañ magar ishq vo hai ki jis ke liye

us ke ġham meñ na gaa.e koī marsiye

jis se hairān ho zar bhī zardār bhī

taḳht bhī taaj bhī aur talvār bhī

dekho ai husn-o-ulfat ke maaro idhar

jāñ-navāzo idhar jāñ-nisāro idhar

koī merī tarah pyaar haare nahīñ

husn ġhairoñ kī duniyā sañvāre nahīñ

kis ne dekha hai ashkon ko bahte hue

sone chandi ke mahlon mein tum ja base

chahaton ki KHushi ka chalan chhoD kar

dil ki dildariyon ki chubhan chhoD kar

ab ye tum hi kaho kaun kis ka nahin

kis ke dar tak nahin kyon kisi ki jabin

kis ne toDa mohabbat ke paiman ko

rog sa lag gaya ruh ko jaan ko

rang ki rup ki pyar ki rahaten

aaj mere liye ban gain hasraten

jaise un se koi wasta hi na tha

kis ke daman se uDti hai bu-e-wafa

kis liye pyar ka nam badnam hai

kis liye is jahan-bhar mein kohram hai

kin riwajon ne duniya mein bis bo diye

ishq ki dewiyan dewta ro diye

tum hi apne nahin kis se shikwe karen

ghair ki aag hai ab jien ya maren

oDhe phirte hain hum hasraton ka kafan

ho mubarak tumhein reshmi pairahan

han magar ishq wo hai ki jis ke liye

us ke gham mein na gae koi marsiye

jis se hairan ho zar bhi zardar bhi

taKHt bhi taj bhi aur talwar bhi

dekho ai husn-o-ulfat ke maro idhar

jaan-nawazo idhar jaan-nisaro idhar

koi meri tarah pyar haare nahin

husn ghairon ki duniya sanware nahin