naqadi kahan se aaegi

pahle rāteñ itnī lambī kab hotī thiiñ

jo bhī hisāb aur khel huā kartā thā

sab mausam kā thā

roz-o-shab kī har saa.at kā ik jaisā paimāna thā

apne milne vaale saare

jhūTe sachche

yāroñ se ik mustahkam yārāna thā

lekin

apne dard kī samtoñ kī pahchān na rakhne vaale dil

ye sochnā thā

har ḳhvāb kī qīmat hotī hai

aur ab in do āñkhoñ meñ itne

tarah tarah ke

duniyā bhar ke ḳhvāb bhare haiñ

in meñ se ik ik ko gin kar

sab ke munāsib daam chukānā

is ke liye to do sadiyāñ bhī kam hoñgī

kañgle

itnī naqadī kahāñ se aa.egī

pahle raaten itni lambi kab hoti thin

jo bhi hisab aur khel hua karta tha

sab mausam ka tha

roz-o-shab ki har saat ka ek jaisa paimana tha

apne milne wale sare

jhuTe sachche

yaron se ek mustahkam yarana tha

lekin

apne dard ki samton ki pahchan na rakhne wale dil

ye sochna tha

har KHwab ki qimat hoti hai

aur ab in do aankhon mein itne

tarah tarah ke

duniya bhar ke KHwab bhare hain

in mein se ek ek ko gin kar

sab ke munasib dam chukana

is ke liye to do sadiyan bhi kam hongi

kangle

itni naqadi kahan se aaegi